གློ་བུར་དུ།
ལྷམ་ཀོག
མེ་ལོང་ཆག་གས་སུ་གྱུར་ནས། གཟུགས་ཕུང་བོར།
ཉིན་དེར། རྨི་ལམ་ལ་རྟ་ཞོན་རེ་གཉིས་ཐོན།
རྟ་ཞོན་གཅིག ཐ་གུ་དམར་པོ་སྒྲིལ་མཁན།
རྟ་ཞོན་གཅིག གཙང་བོ་སྔོན་པོ་འཁྲིད་མཁན།
ངའི་གྲིབ་མ་ཕྱེད་ཀ མཚམས་དེ་ནས་རུལ།
དུས་ཚོད་ཕྱེད་ཀ་ཐལ་བར་གྱུར།
ཐལ་བ་དེའི་ནང་ནས། འཐབ་ར་གཞན་ཞིག་གི་གཡུལ་སར་ཞུགས།
ཤིས་པར་གྱུར་ཅིག
རོང་བོ་དགེ་འདུན་ལྷུན་གྲུབ།
རབ་ཞི་དོན་གཉེར་ལས་ཀྱི་ཤིང་རྟ་འདེད་མཁན་འཕགས་པ་ལྷ་ཡི་ལྷ།།
བདག་གི་སྤྱི་གཙུག་སྡོང་ལོ་གཡོ་བ་བཞིན་གྱུར་དེ་ཡི་སྟེང་དུ་ནི།།
བྱིན་རླབས་རྒྱུན་མི་ཆད་པ་གངྒཱ་བསྐྱིལ་བའི་རལ་ཀློང་ལྟར།།
འཆིང་བྱེད་འགུགས་བྱེད་མི་འཆོལ་མཆོད་པའི་མཛེས་པ་རྟག་ཏུ་ཤིས་པར་སྨོན།།
ལུས་ནི་མི་འགུལ་གྲིབ་མ་མི་གཡོ་བ།།
རི་བོ་ལྟར་གྱུར་སེམས་ཀྱི་ཡུས་དག་ཀྱང་།
འཇོ་བ་མ་རྙེད་ཡིད་ནི་གདུང་བྱེད་པ།།
བསགས་པའི་ལས་ཀྱིས་བགྱིད་དོ་ཐབས་གཞན་གང་།།
ལོ་ཟླ་ཞག་དང་འགྲོགས་པའི་མིག་ཟུང་བུང་བ་དྲན་པས་མ་བཟུང་བ།།
མཆི་མར་དོན་གྱིས་བསྙེས་ཀྱང་ཨམ་ཚུགས་ཡོན་པོ་དེ་ཡིས་གནས་གང་དུ།།
རྟག་ཏུ་བྱ་ར་བགྱིས་པའི་དྲིན་གྱིས་ཁྱེད་ཅག་ཉེ་བའི་འགྲམ་ཀུན་ཏུ།།
ཞུམ་པར་མ་བྱས་དཔའ་བའི་ངང་ཚུལ་ནམ་ཡང་ཡི་གེར་བྲིས་པའོ།།
བརྩེ་བའི་ནགས་ཀློང་ག་ལ་བར།།
རེ་བའི་གོམ་པ་སྤོ་མཛད་པའི།།
ཡབ་ཡུམ་ཕྱག་གི་ཕྲེང་བ་དེས།།
ཉི་འོད་གང་དུ་མ་འགགས་སོ།།
སྐུལ་བ་བཞིན་དུ་ལྷ་དེ་དག།
མཚོ་ལ་ངང་ངུར་ལྡང་བའི་དཔེ།།
རྟག་ཏུ་སེམས་ལ་འདུ་བ་ཤེས།།
སྐྱབས་ཀྱི་དམ་པ་ཇི་སྙེད་སྤྱན་གྱིས་གཟིགས་པ་མ་ལྷོད་པས།།
ཟགས་པའི་ལུས་པོ་འདི་འང་སྐྱོན་གྱིས་ཡོངས་སུ་བྲལ་བ་ནི།།
ཡར་ཚེས་ཟླ་བ་དང་མཚུངས་པདྨ་གསར་བའི་མཛེས་པ་ལྟར།།
འོད་ཀྱིས་འཚེར་རོ་རྣམ་ཀུན་འདི་ལ་རྣ་བ་ཕྱོགས་པའི་ཚོགས།།
འབྲལ་བ་དང་བྲལ་འཛོམས་པའི་རྩིག་པའི་ངོས།།
རི་མོ་འབྲི་བའི་ལག་པའི་འདུ་བྱེད་ནི།།
སྣ་ཚོགས་འཛུམ་དང་ཉེ་བར་བསྡེབས་པ་ལ།།
རྟག་ཏུ་གཡོ་མེད་ལྷ་རྣམས་ཀྱིས་ནི་སྲུང་གྱུར་ཅིག།
2024.11.19
No comments:
Post a Comment