Photo from Gogle
ཨ་རིའི་དུས་དེབ་རྩོམ་སྒྲིག་ཁང་ཞིག་གིས་དེ་སྔར་ཡི་གེ་ཉུང་ལ་འཕེལ་རིམ་ངོ་མཚར་བའི་སྒྲུང་ཐུང་ཞིག་བྲིས་ན་ཨ་སྒོར་སུམ་སྟོང་གི་བྱ་དགའ་སྤྲོད་པར་བསྒྲགས་རྗེས། མི་ཧ་ཅང་མང་པོས་ཐབས་བརྒྱ་ཇུས་སྟོང་གིས་བྱ་དགའ་ལེན་པའི་ཆེད་དུ་འབད་འབུངས་བྱས། གཤམ་གྱི་སྒྲུང་རྩོམ་ནི་བྱ་དགའ་ཨང་དང་པོ་ཐོབ་པའི་སྒྲུང་ཐུང་སྟེ། དེ་ལ་ཤད་ཐེས་པའི་དབྱིན་ཡིག་གི་ཡིག་འབྲུ་ཆིག་བརྒྱ་ལྔ་བཅུ་ལས་མེད།
『རྩོམ་མཁན་མི་གསལ། སྒྱུར་མཁན་ཡེ་ཧྥུའུ་ལུང་།』
ཨེ་ལིས་དབེ་རྣའི་ནུ་བོ་ཧྥོ་ལེ་ཐེ་ཁོ་མོའི་ཁྱོ་ག་པ་པུ་དང་མཉམ་དུ་ཧྥེ་གླིང་དུ་རྔོན་ལ་སོང་། མ་འགྱངས་པར་ཁོ་མོར་གློག་འཕྲིན་ཞིག་འབྱོར་བའི་ནང་དུ་ “པ་པུ་སེང་གེ་རྔོན་སྐབས་འདས། ཧྥོ་ལེ་ཐེས།” ཞེས་འཁོད་འདུག
ཨེ་ལིས་དབེ་རྣ་སྐྱོ་སྣང་ཆེན་པོ་སྐྱེས་ཏེ་ནུ་བོར་ “ཁོང་གི་བེམ་པོ་ཁྱིམ་དུ་སྐྱོལ།” ཞེས་གློག་འཕྲིན་བཏང་།
ཟླ་ཕྱེད་འགོར་རྗེས་ཧྥེ་གླིང་ནས་འབོག་སྒྲིལ་ཆེན་པོ་ཞིག་བསྐུར་བའི་ནང་དུ་སེང་གེའི་རོ་ཞིག་ཡོད་པས། ཁོ་མོས་སླར་ཡང་ “སེང་གེ་འབྱོར། ནུ་བོ་འཆུགས། པ་པུའི་བེམ་པོ་སྐུར་ཅིག” ཅེས་གློག་འཕྲིན་བཏང་།
འཕྲལ་དུ་ཧྥེ་གླིང་ནས་བཏང་བའི་འཕྲིན་ལན་དུ། “འཆུགས་མེད། པ་པུ་སེང་གེའི་ཁོག་ན་ཡོད། ཧྥོ་ལེ་ཐེས།” ཞེས་འཁོད་འདུག
【མཚམས་སྦྱོར།】
སྒྲུང་ཐུང་ཡིག་བརྒྱ་མ་ནི་ནུབ་གླིང་ཀུན་ལ་ཁྱབ་པའི་སྒྲུང་རྩོམ་གྱི་བྱེ་བྲག་ཅིག་ཡིན་ལ་ཉུང་ཞིང་ཐུང་བ་ནི་གང་དེའི་ཁྱད་ཆོས་དང་། ཆུང་བོས་ཆེ་བ་སྟོན་པ་དང་ཉུང་བས་ཟབ་མོ་མངོན་པ་ནི་གང་དེའི་རང་བཞིན་དང་། ཁྱབ་ཆེ་ཞིང་ཉམས་མཚར་བ་ནི་གང་དེའི་སྲོག་རྟེན་ལྟ་བུ་ཡིན། གཏམ་རྒྱུད་སྣེ་གཅིག་ཅན་དང་མི་སྣ་ཉུང་བ། ཁོར་ཡུག་ཆུང་བ། ཚིག་འབྲུ་ཉུང་བ། ཁ་གསལ་བའང་གང་དེའི་ཐུན་མོང་མ་ཡིན་པའི་ཁྱད་ཆོས་ཡིན།
No comments:
Post a Comment