༡ ༽
ཁོ་ཚོས།
ངས་བཏབ་པའི་ལོ་ཏོག་བྲེགས་ནས་འཁྱེར།
ས་ཞིང་ཡང་། བཀོག་ནས་འཁྱེར།
ཁོ་ཚོས།
ངས་ལས་པའི་ལྷ་སྐུ་རྫོགས་ནས་འཁྱེར།
ཁང་བའང་། བཀོག་ནས་འཁྱེར།
ཡིན་ཡང་།
ང་ཤི་མི་རུང་། ང་ཞུམ་མི་རུང་།
ང་ནི་ལོ་ངོ་སྟོང་གི་ཆུ་རྒྱུན་དེ་ཡིན།
མེ་ཏོག་དང་བྱེའུ་ལ་རྣམ་ཤེས་བསྐྲུན་དགོས།
༢ ༽
མདང་དགོང་། མཁར་རྫོང་སྟོང་བ་ཞིག་ཏུ།
རི་དྭགས་རྨས་མ་བཞིན། ཕྱོགས་ངེས་མེད་དུ་བསྐྱོད།
གྲུ་ག་ཞིག་ནས་ངུས་ངུས་མཐར། ཁྱིམ་ལ་སྙེག
ཨར་འདམ་གྱི་ཁང་བ་དེ། ངའི་ཁྱིམ་ཡིན་ནམ།
ཆུང་དྲགས་སོང་། ངའི་ཁྱིམ་དེ།
ས་ཞིང་གི་རོལ་མོ་ཡིན། རོལ་མོ་ཡི་ས་ཞིང་ཡིན།
ཅི་ཞིག་ལ། ཁྱིམ་མཚེས་བཅོས་བཞིན་ཏུ།
ངའི་ཁྱིམ་བཤིག་པར་རྔམ་དགོས།
ངས་ཤེས་ཡོད། ཁྱོད་ཀྱིས།
ངའི་དོན་ལྔ་སྣོད་དྲུག་གི་ཚབ་ཏུ།
བྱང་བུ་དམར་པོ་ཞིག་བཞག་སྟེ།
འཕྲུལ་ཆས་སུ་བསྒྱུར་རྒྱུ་དེ་རེད།
༣ ༽
ཁུར་མོང་བགྲེས་པོས།
ཡི་གེ་ཡི་གདུང་མ་རེ་རེར་འཇུས་ནས།
བར་སྣང་དུ། རིག་པའི་ཕོ་བྲང་ཞིག་བཞེངས།
རླུང་དམར་པོ་ཞིག་ལྡང་བས།
དབུ་སྐྲ་བལ། ཕོ་བྲང་བཤིག
ཁུར་མོང་བགྲེས་པོས།
མིག་ཆུ་སེར་བོ། ཉི་ནུབ་ཀྱི་རི་བོར་འབུལ་དུས།
གྲང་ཤུར་ཤུར། ནག་རོག་རོག
ཁུར་མོང་བགྲེས་པོའི་རྩ་བ།
ས་གཞིའི་སྙིང་ཁར་ཟུག་ཡོད་པས།
དགུན་གྱི་ཤན་པ་སླེབས་ཀྱང་།
མེ་ཏོག་ལ་ཟིལ་བ་ཆགས་པའི་སྐབས་ཤིག་ཡོད།
_____རྐང་མིང་བས།
ཟུར་མཆན།
སྙན་ཚོམ་འདིའི་ཁ་བྱང་ན་བུན་སྐྱ་བོས་བཏགས།
No comments:
Post a Comment