______བཙུན་པའི་གཉིད་གཏམ།
ན་བུན་སྐྱ་བོས་སྒྱུར་སྒྲིག་བྱས།
སྔ་མོར། གྲྭ་བ་ཞིག་གྲོང་ཆོག་ལ་སོང་། ལམ་ནས་བོང་རྒོད་ལྔ་འདེད་པའི་ཁེ་པ་ཞིག་ལ་ཐུག ཕར་བལྟས་ན། བོང་བུར་ཁལ་ལྕི་མོ་རེ་བཀལ་ཡོད་པ་དཔག་ཐུབ།
བཙུན་པས། “ཨ་ཁུ་ཁེ་པ། སྒྱེ་མོ་འདི་དག་གི་ནང་ན་དངོས་ཟོག་ལྗིད་མོ་ཅི་ཞིག་ཡོད། བལྟས་ཚོད་དུ། བོང་བུ་ཚོས་ཁྱག་གི་ཡོད་ས་མ་རེད།” དྲིས་པར།
ཁེ་པས། “སྒྱེ་མོ་འདི་དག་གི་ནང་ན་འགྲོ་བ་མི་ལ་སྤྱོད་སྒོ་ཆེས་ཆེ་བའི་ཚོང་ཟོག་གང་རེ་ཡོད། ཁྲོམ་རར་འཚོང་གི་འགྲོ་གི་ཡོད།” ཅེས་སྨྲས།
“ངོ་མ་སྒྱེ་མོ་འདི་དག་གི་ནང་ལ་དངོས་ཟོག་ཅི་ཞིག་བསྡུས་ཡོད།”
“ཁྱོས་རིག་ནོ་འདི་རེད། སྔོན་གྱི་བོང་བུ་ཕ་གིས་མནར་གཅོད་ཀྱི་ཚོང་ཟོང་སྒྱེ་གང་ཁུར་ཡོད།”
“འོན་ཀྱང་། འདི་དག་ཉོ་མཁན་ཞིག་ཡོད་དམ།”
“ལོས་ཡོད། དབང་ཆ་སྒེར་གཅོད་པས། མནར་གཅོད་ཀྱི་ཚོང་ཟོག་ཉོ་གི་རེད། རིན་གོང་མཐོན་པོར་འཚོང་འདང་ཡོད།”
དེ་ནས་བཙུན་པས་བར་གྱི་བོང་བུར་གོང་མཛུབ་ཀེར་ནས། “དེས་ན། འདིའི་སྒལ་བར་ཅི་ཞིག་བཀལ་ཡོད།” དྲིས་པས།
ཁེ་པ་ན་རེ། “སྒྱེ་མོ་འདིའི་ནང་དུ་ང་རྒྱལ་གྱི་ཚོང་ཟོང་བླུགས་ཡོད། འདི་ལོངས་སུ་སྤྱོད་མཁན་མཁས་པ་ཚོ་ཡིན།”
ཁེ་པས་མུ་མཐུད་དུ་སྨྲས་པ། “དེའི་གཞུག་གི་བོང་བུར་ཕྲག་དོག་གི་ཚོང་ཟོང་བཀལ་ཡོད། འདི་འཛད་པར་སྤྱོད་མཁན་གཞན་གྱི་གྲུབ་འབྲས་རིག་ན་མི་བཟོད་པའི་མི་དག་ཡིན། འདི་ཉོ་མཁན་ཧ་ཅང་མང་།”
“དེའི་གཞུག་གི་བོང་བུས་གཡོ་ཟོལ་གྱི་ཚོང་ཟོང་ཁུར་ཡོད། གཡོ་ཐབས་བཀོལ་ནས་བར་ཁེ་གཉེར་མཁན་ཚོས་ད་གཟོད་འདི་ཉོ་གི་རེད། མི་འདིའི་རིགས་སྔ་མོ་ནས་ཁྲོམ་ར་གང་སར་བང་སྒྲིག་ནས་སྒུག་ཡོད།”
ཡང་བཙུན་པས་འདྲི་རྒྱུར། “དེས་ན་བོང་བུ་ཐ་ཆུང་བར་ཚོང་རྫས་ཅི་ཞིག་བཀལ་ཡོད།”
ཁེ་པས། “སྒྱེ་མོ་འདིའི་ནང་དུ་མགོ་སྣོག་གི་ཚོང་ཟོང་བརྫངས་ཡོད། ནམ་ཞར་ལས་སུ་མི་གཞོལ་པར་གླགས་བཙལ་ནས་མགོ་སྣོག་གཏམ་མཁན་ཚོས་འདི་ཉོ་གི་འདུག” ཅེས་སྨྲས་སོ།།
དེའི་གཞུག་ནས། བཙུན་པ་གློ་བུར་གཉིད་སད་འོངས། ཁོས་ད་གཟོད་བདེན་བདེན་འདྲ་བའི་སྐད་ཆ་འདི་དག་རང་གི་གཉིད་གཏམ་ཡིན་པ་རྟོགས་སོ།།
༗ གཏམ་རྒྱུད་འདིའི་ནང་དུ། སྨྲ་ཤེས་དོན་གོ་བ་ཀེར་ནས་འགྲོ་བ་དག་གི་གཟུངས་གཞུག་བསྡུས་ཏེ། ཀླད་པ་མ་འགུལ་བར་མིག་ཞགས་ཤིག་འཕངས་པས་ཀྱང་བརྡ་དོན་ཡོངས་སུ་རྫོགས་པ་ཁོང་དུ་ཆུད་སྙམ།
No comments:
Post a Comment