________ཅིས་ཀྱང་མི་འཇོན་པའི་བྱ་བ་ནམ་ཡང་ཁས་ལེན་པ་མིན།
__/ན་བུན་སྐྱ་བོས་བསྒྱུར་ཅིང་བསྒྲིགས།
ཁ་ཆར་བུ་ཡུག་འཚུབ་ཅིང་གྲང་ལྷག་རབ་ཏུ་རྒོད་པའི་ནུབ་མོ་ཞིག་ལ། རྒྱུ་ནོམ་ཐེར་འབུམ་གྱི་བདག་པོ་འབྱོར་ལྡན་པ་ཞིག་ཕྱི་རོལ་ཏུ་སོང་ལ། ལམ་ཁར་རྐང་རྗེན་ལུས་རྗེན་དུ་བུད་པའི་བགྲེས་སོང་དབུལ་བོ་ཞིག་ལ་ཕྲད་འོངས། ཕྲད་ནས་ཀྱང་ཁོས་ཕ་རོལ་བོར། “ཨ་རོགས། ཕྱི་ལོགས་འདིར་གྲང་ངར་ཆེ་བས། ཁྱོད་མི་གྲང་ངམ། ཁྱོས་སྟོད་ལྭའང་གོན་མི་འདུག” དྲིས་པས།
དབུལ་བོས་སྨྲས་པ། “སྔོན་ཆད་ཅིག་ལ་ང་ལའང་སྟོད་ལྭ་ཞིག་ཡོད་མོད། ད་ནི་གྲང་འཁྱག་ལའང་ལོབས་སོང་ཟིག”
དེ་ལ་ཕྱུག་པོས། “ཅུང་ཙམ་སྒུག་དང་། ང་ཡུལ་ལ་འགྲོར། ཁྱོད་ལ་སྟོད་ལྭ་ཞིག་འཁྱེར་ཡོང་།” ཅེས་ཁས་བླངས།
དེའི་སྟབས་ཀྱིས། བགྲེས་པོ་ཧ་ཅང་དགྱེས་ཏེ། “ངས་འདི་གར་ཁྱོད་ལ་སྒུག་ནས་འདུག” ཅེས་ཀྱང་སྨྲས་སོ།།
ཕྱིར་ཁྱིམ་ལ་ཡོང་ནས། ཕྱུག་བདག་ཚར་རྒྱུ་མེད་པའི་ལས་ཀར་མགོ་འཁོར་ནས། མེད་པོར་སྟོད་ལྭ་སྟེར་རྒྱུ་ཡིད་ཀྱི་གཏིང་ནས་བརྗེད་པར་གྱུར་རོ།།
ཕྱི་ཉིན་ཞོགས་པར་ཕྱུག་པོས་ད་གཟོད་དབུལ་བོ་ཡིད་ལ་དྲན་ནས། འོངས་དུས། དབུལ་བོ་མདང་ནུབ་འཁྱག་ཤི་ཐེབས་འདུག ཡིན་ནའང་། ཁོས་ཞལ་ཆེམས་ཡི་གེ་ཞིག་བཞག་ཅིང་འདུག
འཕྲིན་ཡིག་ཏུ། “མ་གཞི་ནས་ང་ལ་ཕྱི་ལུས་ལ་གོན་རྒྱུ་སྟོད་ལྭ་དྲོན་པོ་ཞིག་གཞར་ཡང་མེད་ཀྱང་། ནང་སེམས་སུ་གྲང་ངར་གྱི་གདོང་བསུ་བའི་སྙིང་ཤ་སྲ་མོ་ཞིག་ཡོད། ཡིན་ནའང་། ཁྱོས་ང་ལ་སྟོད་ལྭ་ཞིག་འཁྱེར་ཡོང་ཞེས་ཁས་བླངས་པ་ནང་བཞིན། ངས་ཀྱང་ཁྱོད་ལ་ཡིད་བརྟན་པའི་ཉེར་ལེན་གྱིས། ངའི་ནང་སེམས་ཀྱི་སྙིང་སྟོབས་རྩ་བ་ནས་ཞུམ་པར་གྱུར་སོང་།” ཅེས་བྲིས་འདུག
གཏམ་རྒྱུད་ཐུང་ཐུང་འདིའི་བརྗོད་སྙིང་གཙོ་བོ་འདི་ལྟ་སྟེ།
མི་ཚེ་བྱ་བ་ཆེ་ཆུང་ཅི་འདྲ་ཞིག་ཡིན་ན་རུང་གི ཅིས་ཀྱང་མི་འཇོན་པའི་བྱ་བ་ནམ་ཡང་ཁས་ལེན་པ་མིན་ཏེ། གནས་སྐབས་དེའི་ཁྱོད་རང་ཉིད་ལ་མཚོན་ན། ཁས་ལེན་ནི་དེ་འདྲའི་གལ་ཆེན་དོན་ཆེན་ཞིག་ཏུ་མི་བསམ་རུང་། ཕ་རོལ་བོར་མཚོན་ན། དེ་ནི་མི་ཚེའི་བྱ་གཞག་གལ་ཆེན་ནང་གི་འགངས་ཆེན་ཡིན་པར་མ་ཟད། སྐབས་ལན་རེར་ད་དུང་ཤི་གསོན་གྱི་འགག་རྩར་ཐུག་དུས་ཀྱང་ཡོད་པར་གདམས།
No comments:
Post a Comment