༡)
རང་གི་སྲོག་གི་ཕྱིར་དུ་ཡང་ཆོས་མི་གཏོང་བ་ཡིན་ན། ཅི་ཞིག་གི་ཕྱིར་དུ་ཆོས་གཏོང་ངམ། རང་གི་སྲོག་གི་ཕྱིར་དུ་ཡང་བདེན་པ་མི་གཏོང་བ་ཡིན་ན། ཅི་ཞིག་གི་ཕྱིར་དུ་བདེན་པ་གཏོང་ངམ། རང་གི་སྲོག་གི་ཕྱིར་དུ་ཡང་ཉོན་མོངས་པའི་དགྲ་ལ་མི་འདུད་པ་ཡིན་ན། ཅི་ཞིག་གི་ཕྱིར་དུ་ཉོན་མོངས་པའི་དགྲ་ལ་འདུད་དམ།
༢)
ཉོན་མོངས་པའི་དགྲ་ཞེས་པ་ནི། ཉོན་མོངས་ཞེས་པ་ནི་འདོད་ཆགས་ལ་སོགས་པའི་དབང་གིས་སེམས་རབ་ཏུ་མ་ཞི་བ་སྟེ། གང་ཞིག་གཞན་གྱི་རྒྱུ་ནོར་སོགས་རང་ལ་བདག་འདོད་པ་དང་། དེ་ཡི་དོན་དུ་ངོ་ཚ་དང་ཁྲེལ་བག ཡ་ང་དང་འཛེམས་དོགས་ཡེ་མེད་པར། མི་སྤྱོད་ལས་འདས་པའི་སྦྱོར་བས་ཕ་རོལ་བོར་གནོད་ཤ་སྟག་ཏུ་བྱེད་པ། མ་རིག་པའི་མུན་པ་ཆེན་པོས་རང་གི་མགོ་བོ་ཡོངས་སུ་རྨོངས་པར་བྱས་ཀྱང་། ངའོ་སྙམ་པའི་ང་རྒྱལ་གྱིས་གཞན་དག་ཡོངས་སུ་ཚར་གཅོད་པ་ལ་མངོན་ལྐོག་གཉིས་ནས་འབད་པ་ཤ་ཐང་དུ་བྱེད་པ་ཞིག་ཡིན་པར་འདུག དེ་ལྟའི་ལྟ་སྤྱོད་ཅན་དག་ནི་ཤེས་རབ་ཅན་གྱིས་རང་གི་དགྲ་བཞིན་འདོར་བས་ན། ཉོན་མོངས་པའི་དགྲ་ཞེས་ཀྱང་ཟེར། ཉོན་མོངས་པའི་དགྲ་འདིའི་རིགས་ནི་གཞུང་སྒེར་གཉིས་ན་ཡོད་དེ། ཤིན་ཏུ་སྐྱི་གཡའ་བ་ཡིན། སྒེར་བ་དག་གིས་རང་གི་ཉི་ཚེ་བའི་ཁེ་ཕན་གྱི་ཕྱིར་དུ། ཁ་མཆུ་གྱོད་སྣ་འདྲེན་ཞིང་། རྒྱབ་ཀྱི་གཏམ་དང་ལྐོག་གི་ལས་སོགས་རྩོམ། ཡ་རབས་ཀྱི་སྦྱོར་བ་མཐའ་དག་མས་སུ་གཅོད། ཉོན་མོངས་པའི་གཞུང་དག་གིས་རང་གི་ལོག་པའི་དབང་ཆ་བྱུང་རྒྱལ་དུ་སྤྱད་དེ། སྒེར་བའི་ཐོབ་ཐང་དང་དམངས་ཀྱི་འཚོ་ཚིས་ལ་རྡོག་རོལ་གཏོང་། དམག་འཁྲུག་དང་ཟིང་ལོང་གིས་སྤྱི་དམངས་ཀྱི་ལུས་སེམས་བདེ་བའི་སྐབས་བྲལ། དམངས་ཀྱི་རེ་འདོད་ལ་ཁ་ཡ་ཡེ་མི་བྱེད།
༣)
ཉོན་མོངས་པའི་དགྲ་འདི་དག་གི་ལོག་སྤྱོད་ཀྱིས་གནས་སྐབས་སུ་མི་རྣམས་ལ་འཇིགས་སྐྲག་དང་མནར་གཅོད་ཚད་མེད་སྦྱིན་ནའང་། འགྲོ་བ་མིའི་རིགས་ཀྱི་རྒྱུ་འབྲས་བློ་མིག་ནི་ལུས་ལ་འཚེ་བ་དང་སྲོག་ལ་རྒོལ་བ་ཙམ་གྱིས་བག་ལ་ཞ་བ་ཞིག་མ་ཡིན་ནོ།། ཉོན་མོངས་པའི་དགྲ་དེ་དག་གི་ལོག་སྤྱོད་ཇི་ལྟར་རྒོད་ན། མིའི་རིགས་ཀྱི་རྒྱུ་འབྲས་བློ་མིག་དེ་ལྟར་གསལ་དུ་འགྲོ། ཉོན་མོངས་པའི་དགྲ་དེ་དག་གིས་བཙན་གྱིས་འཇིགས་སྐུར་བ་དང་། གཡོ་ཡིས་སེམས་འབྲིད་པ་སོགས་ཐབས་སྣ་དགུ་ཚོགས་ཀྱིས་མི་རྣམས་ཀྱི་མགོ་བོ་རྨོངས་པར་བྱེད་ནའང་། ཤེས་རབ་ཅན་གྱི་མི་རྣམས་ཀྱིས་རང་གི་སྲོག་གཏོང་གིས། ཉོན་མོངས་པའི་དགྲ་ལ་འདུད་པར་མི་བྱེད་དོ།།
༤)
ཉོན་མོངས་པའི་དགྲ་དག་གི་ཉེས་ལྟུང་གིས་མིའི་རིགས་ཀྱི་བྱུང་རབས་སུ་སོས་ཐབས་མེད་པའི་རྨ་ཕབ་ཡོད། ཉོན་མོངས་པའི་དགྲ་དག་གིས་གཞན་གྱི་སྐད་འགོག་པ་དང་། ཆོས་བསྲེགས་པ། སྲོག་ཕྲོག་པ་སོགས་མིའི་རིགས་ཀྱིས་གསོ་ཐབས་མེད་པའི་རྨ་ཤུལ་བསྐྱུར་ཡོད། ཉོན་མོངས་པའི་དགྲ་དེ་དག་ཡོད་པས། ཤེས་རབ་ཅན་གྱི་མི་དག་གི་འོད་ཟེར་གསལ་དུ་སོང་བ་ཡིན། ཤེས་རབ་ཅན་གྱི་མི་དག་ནི་ཉོན་མོངས་པའི་དགྲ་ཡི་གཉེན་པོར་བྱོན་པ་ཡིན། ཁོ་ཚོས་ཉོན་མོངས་པའི་དགྲ་དག་གི་ཉེས་ལྟུང་གསལ་རྗེན་དུ་འདོན་པ་ཡིན། ཤེས་རབ་ཅན་གྱི་མི་དག་གིས་རང་གི་སྲོག་གཏོང་བ་བླ་ཡི། ཉོན་མོངས་པའི་དགྲ་ལ་འདུད་པ་མི་སྲིད་དོ།།
__________ཞོགས་ལྗང་།
No comments:
Post a Comment