ཁྱོད་རང་དྲན་པའི་ལོ་ཟླའི་སེམས་གཏམ།
____ གྲོགས་(Sonam)ལགས་སུ་སྤྲིངས་པ།
གངས་མཚོ།
ཁག་གཉིས་པ།
《གཅིག》
ངའི་མི་ཚེའི་འདས་སོང་གི་ལོ་ཟླའི་ཁྲོད་ནས།ཆེས་བརྗེད་པར་དཀའ་བ་ནི་བཙོན་དུ་ལུས་པའི་ལོ་ཟླ་དེ་དག་ཡིན་ལ།ལོ་ཟླ་དེ་དག་གི་ཀློང་དུ་མུན་པའི་སྨག་རུམ་མཐུག་དྲགས་པའི་དབང་གིས།བཙོན་གྱི་འཚོ་བ་ནི་ལུས་ཀྱི་ཤ་གསེང་ལ་ཟུག་པའི་ཚེར་མའི་ཕུང་བོ་ཞིག་དང་།སེམས་ཀྱི་གཏིང་རིམ་དུ་བཞུར་བའི་གྲང་ངར་གྱི་གཙང་བོ་ཞིག་ཏུ་གྱུར་ཡོད།དེ་ལྟ་ན་ཡང་།ངའི་ལུས་སེམས་གཉིས་ཀྱི་སྟེང་དུ་མནར་གཅོད་གྲངས་ཀྱིས་མི་ལོངས་པ་ཞིག་བྱུང་བ་ནི།རང་གིས་བདམས་པའི་ཚེར་མའི་ལམ་བུ་ཞིག་དང་།ང་ནི་རྒྱ་ནག་ལ་བཙོན་ཁང་དྲུག་བརྒྱ་ལྷག་ཡོད་པའི་ནང་དུ་དབྱར་ཚ་བས་གདུང་ཞིང་དགུན་གྲང་ངར་གྱིས་གཙེས་ཏེ།ཉིན་ནས་ཟླ་དང་།ཟླ་ནས་ལོ་ལ་ལྟོ་སྐྱ་གོས་ཧྲུལ་གྱི་འཚོ་བ་ངན་ངོན་ཁོ་ན་ལ་རོལ་བའི་བཙོན་མ་ས་ཡ་གཅིག་དང་འབུམ་དྲུག་ལྷག་གི་གྲས་ཀྱི་ཆེས་སྤྱིར་བཏང་གི་བཙོན་མ་ཞིག་ཀྱང་ཡིན་པས།དཀའ་སྡུག་གི་ལམ་བུ་འདི་ནས་སུ་དང་གང་ལའང་འཁང་ར་སོགས་བྱེད་མ་མྱོང་ཞེས་བཤད་ན་རྫུན་དུ་མི་འགྲོ་བ་ཡིན།
འོན་ཀྱང་།ཐོག་མར་ངེད་གཉིས་ངོ་ཤེས་པའི་བརྒྱུད་རིམ་དང་།བར་དུ་འགྲོགས་ཤིང་འདྲིས་པའི་ལོ་ཟླ།མཐའ་མར་གྱེས་བྲལ་བྱུང་བའི་འདས་དོན་དེ་དག་ནི།ངས་དུས་གཏན་དུ་བརྗེད་མ་མྱོང་བ་དང་།དེ་མིན་སྔར་སྤྱི་ཚོགས་སུ་ཡོད་པའི་སྐབས།ངེད་གཉིས་དངོས་སུ་ཐུག་པའི་གོ་སྐབས་ནི་ཧ་ཅང་དབེན་པ་རེད།མི་ལོ་ཧྲིལ་པོ་བཅུ་གཅིག་ལྷག་གི་རིང་དུ་ཐེངས་གསུམ་ཙམ་ལ་ཐུག་པ་དང་།ད་སྔ་བར་དུ་མི་ལོ་ཧྲིལ་པོ་བཅུ་གཅིག་ལྷག་གི་ནང་དུ་ངེད་གཉིས་དངོས་སུ་ཐུག་སྟེ།ལྷན་འཛོམས་བྱུང་བའི་དུས་ཀྱི་རིང་ཐུང་ནི་ཆུ་ཚོད་བཅུ་གཉིས་ཙམ་ཡང་འགོར་ཡོད་མེད་ཅིག་རེད།ཡིན་ཡང་།དུས་རྒྱུན་བརྡ་འཕྲིན་ལམ་གྱི་འབྲེལ་བ་ནི།ང་རང་བཙོན་དུ་མ་སོང་བར་དུ་ཆད་མ་མྱོང་བ་མ་ཟད།ལྷག་པར་དུ་ཁྱོད་དང་ཁ་བརྡ་བྱས་པའི་སྐར་ཆ་རེ་རེའང་།ངའི་སེམས་ཀྱི་གཏིང་རིམ་དུ་འཚེར་བའི་འོད་སྣང་ཞིག་ཏུ་གྱུར་བས།ཁྱོད་ནི་ངའི་སྐྱིད་སྡུག་ལེགས་ཉེས་ཀྱི་བྱ་བ་གང་ལ་འཕྲད་ཀྱང་།ང་ཡི་དགའ་རོགས་དང་སྐྱོ་རོགས་སུ་སྒོམ་ཡོད་པས། ངའི་སེམས་པ་འདི་ཁེར་རྐྱང་གི་རླུང་བུས་སྒུལ་མ་མྱོང་ལ།ངའི་མིག་ཟུང་འདི་སྡུག་བསྔལ་གྱི་མཆི་མས་བརླན་མ་མྱོང་བ་རེད།
《གཉིས།》
ཡིན་ནའང་།ལོ་དེའི་མཚན་མོ་དེ་ལ་ངེད་གཉིས་སོ་སོར་བྲལ་བའི་དུས་ནས་བཟུང་།ངའི་མཚན་མོ་རེ་རེ་སྨག་ནག་གིས་བཟུང་བས།ངའི་སེམས་ལ་མིག་ཆུའི་གཙང་བོ་བཞུར་ཏེ་འཁྱག་སིབ་སིབ་དང་།ངའི་ལུས་པོ་གྲང་ངར་གྱི་རླུང་གིས་སྒུལ་ནས་འདར་འདར་སིག་སིག་ཏུ་གྱུར།དེ་དུས་ཞེ་སེམས་འཁྲེང་ས་ཁྱོད་ཡིན་ལ།ལྷག་པར་དུ་ཟླ་བ་རེ་རེའི་ནང་དུ་ཁ་པར་གཏོང་སྐབས་སུ་ཁྱོད་ལ་ཁ་པར་ཞིག་འཕྲོད་ན་ཅི་མ་རུང་དང་།དེ་མིན་བཙོན་མ་དག་ལ་སོ་སོའི་ནང་མི་དག་གིས་འཕྲིན་དང་འདྲ་པར་སོགས་འབྱོར་བའི་སྐབས་སུ།འཕྲིན་ཡིག་དེའི་ཁྲོད་ན་ཁྱོད་ཀྱིས་ང་ལ་བསྐུར་བའི་འཕྲིན་ཡིག་ཡོད་ན་ཅི་མ་རུང་སྙམ།དྲང་མོ་བཤད་ན།ཁྱོད་ཀྱིས་ང་ལ་འཕྲིན་ཡིག་ཅིག་བསྐུར་ཡོང་བའི་རེ་བ་ནི་སྐོམ་ལ་ཆུ་དང་ལྟོགས་ལ་ཟས་འདོད་ལྟར་དུ་ཡིད་སེམས་འཁྲེང་མྱོང་བ་ཡིན།ཡིད་སྐྱོ་བ་ཞིག་ལ་དེ་ནི་ངའི་མི་ཚེའི་ཁྲོད་ཀྱི་སོས་མེད་སེམས་ཀྱི་རྨ་ཁ་ཞིག་ཏུ་གྱུར་སོང།
གཞན་བཙོན་དུ་བསྡད་པའི་རིང་དུ་ངས་དུས་རྒྱུན་ཁྱོད་ཉིད་དྲན་པའི་གདུང་བ་འགོག་མེད་དུ་སྐྱེས་ཏེ།ངའི་སེམས་ལ་སྐྱོ་སྣང་གི་སྨུག་པ་འཐིབས་ཏེ་ཁེར་རྐྱང་གི་ཆབ་རོམ་ཆགས་པ་ནི།སེམས་ཀྱིས་བཟོད་བསྲན་མི་ཐུབ་པའི་ན་ཟུག་གི་ལོ་ཟླ་ཞིག་དང་།ལུས་ཀྱིས་ཐེག་མི་ནུས་པའི་སྡུག་བསྔལ་གྱི་རི་བོ་ཞིག་རེད།སྤྱིར་བཙོན་གྱི་ཁོར་ཡུག་ནི་དཀའ་བ་བརྒྱ་ཕྲག་མྱངས་པའི་ལོ་ཟླ་ཞིག་ཡིན་ཞེས་བཤད་ཀྱང་།ང་ལ་མཚོན་ན།དཀའ་བ་བརྒྱ་ཕྲག་ལས་ཆེས་བཟོད་ཐབས་བྲལ་བ་ནི་ཁྱོད་ཉིད་དྲན་པའི་ཉིན་མཚན་དེ་དག་ཡིན་པ་རེད།དེའི་ཕྱིར་དུ།དེ་རིང་ཡང་ངས་ཁྱོད་ལ་འཕྲིན་ཡིག་སོགས་འབྲི་བ་ནི་གཅིག་ནས་ལོ་ངོ་མང་པོའི་རིང་དུ་བཙོན་དུ་ལུས་པའི་ལུས་སེམས་ཀྱི་ངལ་དུབ་སེལ་བའི་ཆེད་དང་།གཉིས་ནས་ལོ་ངོ་དེ་དག་གི་རིང་དུ་ཁྱོད་མ་དྲན་པའི་ཉིན་མ་གཅིག་ཀྱང་མེད་པའི་དབང་གིས།ངའི་དྲན་གདུང་གི་ན་ཟུག་དང་།ངའི་ཁེར་རྐྱང་གི་མནར་གཅོད།ངའི་སྐྱོ་སྣང་གི་ཚོར་བ་སོགས་ནི།ཁྱོད་ཉིད་ཁོ་ན་ལ་སྦས་སྐུང་མ་བྱས་པར་བཤད་ན།ཆབ་རོམ་གྱིས་བསྡམས་པའི་སེམས་པ་སྙི་མོ་དེ་ལ་དྲོད་སྣང་རེ་འབྱུང་སྲིད་པས་ཡིན།
《གསུམ།》
དེ་རིང་ཁོ་བོ་བཙོན་གྲོལ་བྱུང་སྟེ།ངེད་གཉིས་ཀྱི་སྔར་གྱི་སོང་ཟིན་པའི་བཤུལ་ལམ་ལ་ཕྱིར་མིག་ཅིག་བལྟས་ན་འགྲོ་ལམ་ནི་ཀྱག་ཀྱོག་དང་མདུན་ལམ་ནི་འོད་སྟོང་འཕྲོ་བ་ཞིག་ཏུ་ལོག་དགོས་པའི་རེ་བ་མི་ཆུང་བ་ཡོད།དེའི་ཕྱིར་དུ།ངས་དུས་རྒྱུན་ཁྱོད་ལ་དཔེ་ཀློག་དང་འབྲེལ་བའི་ཁ་བརྡ་ཉུང་ངུ་རེ་བྱེད་པ་དང་།ལྷག་པར་དུ་ད་ལོར་ངས་ཁྱོད་ལ《བོད་ཀྱི་ལོ་རྒྱུས་གླེང་བའི་གཏམ》དང《གྲུབ་མཐའི་སྐོར་གྱི་རྣམ་བཤད།》གཞན《འཛམ་གླིང་ལོ་རྒྱུས་སྤྱི་བཤད།》《སྒེའུ་ཁུང་གམ་གྱི་ཐོ་ཐོ་མ》བཅས་བསྐུར་ཐུབ་སོང་བ་ནི་སེམས་ཀྱི་གཏིང་ནས་དགའ་འོས་པ་ཞིག་ཏུ་གྱུར་ཡོད།དེ་དང་འབྲེལ་ཏེ་དཔེ་ཆ་དེ་དག་རེ་རེ་བཞིན་རགས་ཙམ་ཞིག་གླེང་ན།ཐོག་མར་རྒྱལ་མོ་འབྲུག་པས་བྲིས་པའི་《བོད་ཀྱི་ལོ་རྒྱུས་གླེང་བའི་གཏམ》ཞེས་པའི་དཔེ་ཆ་དེའི་སྐོར་ནས་ཉུང་ཙམ་ཞིག་བཤད་ན།སྤྱིར་མི་ཞིག་མཚོན་ན།རང་གི་ཕ་ངོ་མ་ཤེས་ན་མི་ཀུན་གྱིས་ཕ་མེད་དྭ་ཕྲུག་ལྟ་བུ་ཞེས་འཕྱ་དམོད་བྱེད་སྲིད་པ་དང་།“ལོ་རྒྱུས་ཚིག་གསུམ་མ་གོ་ན།ཕ་ཨ་ཁུ་ཡིན་རུང་ངོ་མི་ཤེས།”ཞེས་པའི་གནས་སུ་མི་ལྷུང་བའི་ཆེད་དུ་བོད་ཀྱི་ལོ་རྒྱུས་ཀྱི་རྒྱུན་ཤེས་གཙིགས་སུ་བཟུང་སྟེ་བྲིས་པའི་དཔེ་ཆ་དེར་རང་ཉིད་བོད་མི་ཞིག་ཡིན་པའི་ངོས་ནས་བལྟས་ན་མི་འགྲིག་པ་མེད་སྙམ།ཡིན་ནའང་།དཔེ་ཆ་དེ་ནི་བོད་ཀྱི་ལོ་རྒྱུས་སྐོར་གྱི་ཆེད་སྤྱོད་ཀྱི་ཐ་སྙད་དག་གི་སློབ་དེབ་ཙམ་ལས།བོད་ཀྱི་ལོ་རྒྱུས་ཀྱི་ལྟ་བ་མཚོན་བྱེད་ཀྱི་དཔེ་ཆ་ཞིག་རེད་ཅེས་དུས་གཏན་དུ་བཤད་མི་སྤོབས་པ་ཡིན།
དེ་མིན་མཁས་དབང་དུང་དཀར་བློ་བཟང་འཕྲིན་ལས་ཀྱི་གསུང་འབུམ་པོད་བརྒྱད་ཀྱི་ནང་ནས《གྲུབ་མཐའི་སྐོར་གྱི་རྣམ་བཤད》ཅེས་པའི་དཔེ་ཆ་དེ་ཀློག་པའི་དགོས་པ་རེ་གཉིས་ཙམ་མཆིས་པ་རེད།དེ་ལས་གཅིག་ནི་ང་ཚོའི་གཙོ་རྒྱུགས་རིག་གནས་ནང་བསྟན་ཆོས་ལུགས་སུ་གྱུར་བས།དཔེ་ཆ་དེར་སྤྱིར་ནང་བསྟན་ཆོས་ལུགས་ཀྱི་སྲོད་གཏོད་མཁན་སངས་རྒྱས་ཤཱཀྱ་ཐུབ་པའི་མི་ཚེའི་ལོ་རྒྱུས་དང་།དེ་མིན་ནང་བསྟན་ཆོས་ལུགས་ཀྱི་ལོ་རྒྱུས་སྟེང་དུ་བྱུང་བའི་བཀའ་བསྡུའི་རིམ་པ།ནང་བསྟན་ཆོས་ལུགས་ཀྱི་ཆེས་སྤྱིར་བཏང་གི་རྒྱུན་ཤེས་དང་ལྟ་བའི་སྐོར།ནང་སྒོས་སུ་བོད་བརྒྱུད་ནང་བསྟན་གྱི་གྲུབ་མཐའ་སོ་སོ་ཇི་ལྟར་བྱུང་བ་དང་།གྲུབ་མཐའ་སོ་སོའི་སྲོལ་གཏོད་མཁན་གྱི་སྐྱེས་ཆེན་ཚོའི་མི་ཚེའི་ལོ་རྒྱུས་རགས་རིམ་ཙམ་དང་།ཁོང་ཅག་གི་འཐུས་ཚབ་ཀྱི་བརྩམས་ཆོས་བཅས་ཚིག་ཉུང་དོན་བསྡུས་སུ་ངོ་སྤྲོད་གནང་ཡོད་པས་ལན་གཟིགས་ན་བོད་ཀྱི་ཆོས་དང་རིག་གཞུང་ལ་རང་རྟོགས་རྙེད་པ་གདོན་མི་ཟ་བ་རེད།གཉིས་ནས་རང་ཉིད་ཀྱི་དད་པའི་ཡུལ་དུ་གྱུར་བའི་ཆོས་ལུགས་གང་ཡིན་ན་ཆོས་ལུགས་དེའི་ལོ་རྒྱུས་ཀྱི་བྱུང་རིམ་དང་།ཆོས་ལུགས་དེའི་གཞུང་ལུགས་ཀྱི་རྒྱུན་ཤེས་དང་འབྲེལ་བའི་ཐ་སྙད་དག་གི་གོ་དོན་ཅུང་ཙམ་རེ་ཤེས་རྟོགས་བྱུང་ན།ཕྱོགས་གཅིག་ནས་རྨོངས་བའི་དད་པ་འཚོ་བའི་གེགས་རྐྱེན་དུ་གྱུར་བའི་བོད་མི་བྱིངས་དང་མི་འདྲ་བར།དད་པ་ཞེས་པ་ནི་སྐྱིད་སྡུག་གང་གི་འཚོ་བའི་ཀློང་དུ་སེམས་ཀྱི་སྙིང་སྟོབས་ཤིག་ཏུ་འགྱུར་བས་ཀྱང་ཡིན།
《བཞི།》
དེ་ནས་ «འཛམ་གླིང་ལོ་རྒྱུས་སྤྱི་བཤད།» ཅེས་པ་ནི་མི་ཚེ་ཧྲིལ་པོར་རྩོམ་པའི་བྱ་བས་དུས་འདའ་བར་བྱས་པའི་དབྱིན་ཇིའི་རྩོམ་པ་པོ་གྲགས་ཅན་ཝེ་འོལ་སིས་བརྩམས་ཤིང་མི་ཚེ་ཧྲིལ་པོར་བོད་ཀྱི་སློབ་གསོའི་སྐོར་ལ་སྟིམ་བཞིན་པའི་རྒན་འཇམ་དབྱངས་བཀྲ་ཤིས་ཀྱིས་བསྒྱུར་བའི་ལོ་རྒྱུས་ཀྱི་དཔེ་ཆ་དེར་བལྟས་ན།སྤྱིར་འགྲོ་བ་མིའི་རིགས་ཀྱི་ཆབ་དཔལ་རིག་གསུམ་གྱི་བྱུང་འཕེལ་དང་།བྱེ་བྲག་ཏུ་ནུབ་གླིང་གི་ལོ་རྒྱུས་སྟེང་བྱུང་བའི་བློ་འབྱེད་ལས་འགུལ་དང་རིག་རྩལ་བསྐྱར་དར།ཆོས་ལུགས་བསྒྱུར་བཅོས་སོགས་ཀྱིས་བསྐྱ྄ེད་འབྲས་མི་འདྲ་བ་དང་།ལོ་རྒྱུས་རྒྱབ་ལྗོངས་ཀྱི་མི་འདྲ་བ་རེ་རེ་ལ་དངོས་ཤུགས་བརྒྱུད་གསུམ་ནས་སློབ་སྦྱོང་གང་ནུས་རེ་བྱས་ཏེ།གནད་དོན་སྐོར་ཞིག་ལ་བསམ་གཞིགས་མི་བྱེད་རང་བྱེད་དུ་གྱུར་ཡོད།དེ་ནི་དཔེར་ན་ནུབ་གླིང་ལ་ཅིའི་ཕྱིར་དུ་རང་དབང་དམངས་གཙོའི་སྲིད་ལུགས་དར་སོང་བ་དང་།ཇི་ལྟར་དུ་ནུབ་གླིང་ལ་སྨྲ་བརྗོད་རང་དབང་གི་ཁོར་ཡུག་ཅིག་ཆགས་སོང་བ་ཡིན་ནམ།ད་དུང་།ང་ཚོ་བོད་ཀྱི་སྤྱི་ཚོགས་སུ་ནང་གི་ཆོས་ལུགས་དབང་བསྒྱུར་ཤུགས་ཇི་ལྟར་ཆེ་ན་མང་ཚོགས་ནི་དེ་ལྟར་ཤེས་རྨོངས་ཀྱི་གྲོག་རོང་དུ་ལུས་པ་མ་ཡིན་ནམ།དེ་མིན་སྲིད་ཀྱི་སྡིག་སྒྲིབ་འཐིབས་པའི་ལམ་ལུགས་དང་སྒྲིག་གཞི་ཡིས་གཅུན་དྲགས་ཏེ་མུན་པ་སིབ་སིབ་ཀྱི་ཉིན་མཚན་ཀློང་དུ།ཆེས་གལ་ཆེ་བ་ནི་ཐོག་མར་རང་ཉིད་ནས་མགོ་བརྩམས་ཤིང་།རང་ཉིད་ཀྱི་མ་རིག་པའི་མུན་པ་ཤེས་རབ་ཀྱི་རལ་གྲིས་གཤགས་ཏེ་ལོ་རྒྱུས་ཀྱི་ཉམས་མྱོང་ལ་གཞིར་བཅོལ་ནས་གོམ་ཁ་སྤོ་དགོས་པ་མ་ཡིན་ནམ།
གཞན་《སྒེའུ་ཁུང་གམ་གྱི་ཐོ་ཐོ་མ》ཞེས་པའི་དཔེ་ཆ་དེ་ནི།ང་ཚོ་བོད་ཀྱི་སྤྱི་ཚོགས་ལྟ་བུའི་ཁྱིམ་ཚང་སློབ་གསོས་སྟོང་བའི་ཁྱིམ་བདག་ཕ་མ་རྣམས་དང་།འབྱུང་འགྱུར་གྱི་ལོ་ཟླའི་ཁྲོད་དུ་ཁྱིམ་བདག་ཕ་མ་གང་རུང་དུ་གྱུར་དང་འགྱུར་བཞིན་པའི་མི་སུ་ལ་མཚོན་ན།རང་ཉིད་ཀྱི་བུ་ཕྲུག་དག་རྗེས་ལུས་ཀྱི་སློབ་གསོའི་འོག་ནས་འཚར་ལོངས་འབྱུང་དུ་འཇུག་པར་མི་བསམ་ན།ཁྱིམ་ཚང་སློབ་གསོ་དང་འབྲེལ་བའི་དཔེ་ཆ་དེར་གཟིགས་པ་དང་།དར་ནས་སློབ་གསོ་ཞེས་པར་བསམ་བློ་ཞིབ་མོ་བཏང་སྟེ།དུས་རྒྱུན་འཚོ་བའི་ཀློང་དུ་དཔེ་ཀློག་གི་གོམས་སྲོལ་ཞིག་ཆགས་ཐུབ་ན།གཅིག་ནས་རང་ཉིད་ཀྱི་ཤེས་རྨོངས་ཀྱི་བྲག་རི་གཏོར་གྱིན་སློབ་གསོའི་ལྟ་བ་ལ་ངེས་ཤེས་རྙེད་པ་དང་།གཉིས་ནས་རང་ཉིད་ཀྱི་བུ་ཕྲུག་རྣམས་ཀྱང་བདེ་ཐང་གི་སློབ་གསོ་ཞིག་གི་འོག་ཏུ་འཚར་ལོངས་འབྱུང་ཐུབ་པའི་རེ་བའང་ཆེན་པོ་ཡོད་སྙམ་པ་རེད།གང་ལྟར། འཚོ་བའི་ཁྲོད་དུ་དཔེ་ཆ་མེད་ན།ཉི་འོད་མེད་པ་དང་ཕལ་ཆེར་འདྲ་ལ།ཤེས་རབ་ཅན་གྱི་མི་ལ་དཔེ་ཆ་མེད་ན།གཤོག་པ་མེད་པའི་བྱ་དང་ཀུན་ནས་མཚུངས་ཞེས་པས།ཐོག་མར་དཔེ་ཆ་ལས་འཛམ་གླིང་ལ་རྒྱུས་ལོན་བྱུང་ན།བློ་སྒོ་འབྱེད་པའི་ཚོར་སྣང་ཟབ་མོ་ཐོབ་པ་དང་།དོན་དངོས་སུ་བསྒྱུར་དུ་མེད་པ་ནི།དཔེ་ཀློག་ནི་མི་ཚེ་ཧྲིལ་པོའི་བདེ་སྐྱིད་ཀྱི་བྱ་བ་དང་།དཔེ་ཆ་ལ་དགའ་བའི་མི་རྣམས་ཀྱི་ཆེས་བདེ་སྐྱིད་ཀྱི་འཇིག་རྟེན་དེའང་ཡིན་པ་རེད།རྩོམ་ཐུང་འདི་ནི་བདག་གི་གྲོགས་སུ་གྱུར་ཏེ་མི་ལོ་བཅུ་གཅིག་ལྷག་འགོར་བའི་གྲོགས་ཁྱོད་ལ་ལོ་གསར་བའི་ནང་དུ་ཅི་བསམ་ཡིད་བཞིན་འགྲུབ་པའི་སྨོན་འདུན་ཙམ་དུ་ཕུལ་བའོ།།
༢༠༢༣ / ༡ / ༢༣ ཉིན་ཤར་མར་བྲིས།
No comments:
Post a Comment