གཞན་དབང་དུ་གྱུར་བའི་ང་ཚོ།
དུག་ཚེར།
དམར་པོའི་དཔུང་གིས་ཧམ་སེམས་ཚ་མོས་གངས་རིའི་ལྗོངས་སུ་ཁྲག་ལམ་བཏོད།།
དམྱལ་བའི་ཁྲིམས་ལུགས་ལག་བསྟར་བྱས་ཏེ་བག་ཕེབས་འཚོ་བ་རྩད་ནས་གཏོར།།
རིགས་འདིའི་ངོ་གདོང་ས་ལ་བསྲེ་ཆེད་གཡོ་ཐབས་འཕྲུལ་གྱི་འཁོར་ལོ་བསྐོར།།
སྣ་མང་གཏེར་ཁ་བཙན་གྱིས་བྱུང་ནས་དག་གཙང་ཞིང་ལ་རྨ་ཁ་བཟོས།།
འདས་སོང་ལོ་ཟླའི་ཁུགས་སོ་རེ་ན་དམར་པོ་ཁྲག་གི་གཏམ་རྒྱུད་རེ།།
ད་ལྟའི་གནས་བབ་འཚོ་བ་མཐོང་ན་མིག་ཆུ་ཤོར་བའི་སྐྱོ་གར་རེ།།
མ་འོངས་འབྱུང་འགྱུར་བྱ་བར་དཔག་ཚེ་འཇིགས་སུ་རུང་བའི་ཚོར་བ་རེ།།
ཁ་བའི་སྤུན་ཟླ་རེ་རེའི་སེམས་ན་བཟོད་ཐབས་བྲལ་བའི་སྡུག་བསྔལ་རེ།།
གསོལ་བའི་ལྷ་ལ་ནུས་མཐུ་ཡོད་ན་ཁ་བའི་བདེ་སྡུག་གཟིགས་རན་ལ།།
རེ་བའི་མི་ལ་དྲང་བདེན་མངའ་ན་བོད་པའི་ལས་དབང་བསྒྱུར་རེ་རན།།
ཁ་བཤད་སྣུམ་པོས་ངོ་དགའ་མ་གཏོགས་ལག་ལེན་སྟེང་དུ་མ་འཁྱོལ་ན།།
རང་དབང་དམངས་གཙོའི་མཚན་སྙན་ཁུར་ཡང་མིང་སྟོང་ཙམ་ལས་ཡང་སྙིང་ཅི།།
དཀར་དམར་གཉིས་ཀྱི་བར་ལ་བྱུང་བའི་ཞེ་འཁོན་ཁྲག་གི་བུ་ལོན་འདི།།
ཇི་སྲིད་འཁོར་བ་མ་སྟོང་བར་དུ་སེལ་བའི་དུས་ཤིག་མི་སྲིད་པས།།
ཇོ་མོ་གླང་མ་ཕྲག་ཏུ་ཁུར་ནས་ཁྲི་ཤོར་རྒྱལ་མོ་བསྐམ་དགོས་ཀྱང་།།
དམར་པོའི་གཞུང་ལ་ངོ་རྒོལ་བྱེད་རྒྱུ་དུག་ཚེར་ང་ཡི་དམ་བཅའ་ལགས།།
ལོ་རྒྱུས་སྙིང་བསྡུས།
སྨྱུག་མིང་དུག་ཚེར། དངོས་མིང་པདྨ་རིན་ཆེན། ལོ་རབས་བརྒྱད་ཅུར་དཀར་མཛེས་བྲག་མགོ་རྫོང་དུ་སྐྱེས། བོད་ཁུལ་གྱི་སློབ་གྲྭ་ཆུང་འབྲིང་འགྲིམས།
ཕྱི་ལོ་༢༠༡༡ ལོར་སྒེར་དེབ་<<ལྟོས་>>བརྩམས་རྗེས། "མི་རིགས་ཁ་བྲལ་གྱི་ངན་སྐུལ་"ཞེས་པའི་ཞྭ་མོ་གཡོགས་ཏེ། འཛིན་བཟུང་གཅར་རྡུང་བཏང་ནས་ནད་པར་བཟོས།
ཁོང་གི་སྒེར་དེབ་ནང་དུ་ཀྲུང་གོས་བོད་ལ་འཛིན་པའི་སྲིད་ཇུས་དང་དེའི་མཇུག་འབྲས། ས་བྱི་ཞི་རྒོལ་སྐབས་ཀྱི་བོད་མྱིའི་གནས་སྟངས་དང་དེ་འབྲེལ་གྱི་བཅར་འདྲི། སྐྱེ་རྒུ་མདོར་ས་ཡོམ་གོད་ཆག་བྱུང་སྐབས་ཀྱི་ནང་གནས་དངོས་བྲིས་ཡོད།
གཞི་ནིང་ལོར་སྒེར་དེབ་གཉིས་པ་འབྲི་བཞིན་པའི་གནས་ཚུལ་གླེང་མ་ཐག གློ་བུར་དུ་གར་སོང་ཆ་མེད་དུ་གྱུར། འདི་ལོའི་ཕྱི་ཟླ་༩ བར་བསྐྱར་དུ་མི་ལོ་༤ ཡི་ཁྲིམས་ཆད་བཙན་འགེལ་བྱས་རྗེས། ཤུལ་དུ་ཨ་མ་ནད་པ་ཞིག་དང་སྲིང་མོ་ལོ་ཆུང་ཞིག་ལས་ཅི་ཡང་མ་ལྷག
No comments:
Post a Comment