སྙན་ངག་པ། མདའ་བཙན་པོ།
གང་ཞིག ཁེར་རྐྱང་དུ་བླུགས་ནས།
ཁོལ་བྱེད་དུ་དྲན་གདུང་གི་མེ་སྦར་ནས།
རེ་སྒུག་གི་དབུགས་རྒྱབ་མོད།
གཅིག་ཟེར་བའི་བརྩིས་མ་ཚར་བའི་རང་ཉིད་དང་།
གཉིས་ཟེར་བའི་ངོས་མ་ཟིན་པའི་གཞན་དེ་དང་།
གསུམ་ཟེར་བ་ཞིག་ཡོད་ཡོད་འདྲ་བའི་དུས་ཚོད་ཀྱིས།
མི་ཚོགས་རྡུང་ནས་ང་ལ་ལག་སྒྲོག་བཟོས་སོང་།
སེམས་ཀློག་ནས་ང་ལ་ཁྲིམས་བཅས་སོང་།
གནམ་ངོ་ཤིན་ཏུ་རུབ་པས།
སྐད་རིགས་གཞན་པ་ཞིག་སྦྱངས་ནའང་འགྲིག་པ་འདྲ།
སྲང་ལམ་ཟེར་བ་དེ་བཞུས་ནས་གྲི་ཞིག་རྡུང་ན།
མིའི་ཞེ་སྡང་ཡང་གཅོད་ཐུབ་པ་འདྲ།
སྒེའུ་ཁུང་འདི་དོང་ཞིག་ཡིན་ན།
འདིའི་ནང་དུ་མ་ལྷུང་བའི་མིག་ཟུང་ཞིག་མེད་པ་འདྲ།
གལ་ཏེ། ལོང་བ་ཚོ་ཟེར་ན།
དེ་མ་གཞི་ནས་དོང་ཞབས་མེད་ཅིག་ཡིན་པས།
དེ་རུ་སྒེའུ་ཁུང་ཡང་ལྷུང་ནས་བསྐལ་བ་ཞིག་འགོར།
ཉིན་གུང་འདི་ཚོང་རྫས་ཤིག་ཡིན་ན།
དེ་འདྲའི་ཚོང་བྲིན་པོ་ཞིག་མིན་མོད།
ས་ཆགས་ཤིན་ཏུ་བཟང་སྟེ་སྲོད་དང་ཐོ་རེངས་གཉིས་ཀྱི་དཀྱིལ་ན་ཡོད།
བུ་མོ་ཚོའི་འདོམ་གྱི་དེ་དཀར་ཡོལ་ཞིག་ཡིན་ན།
ང་ཚོའི་ཟ་མ་བཟའ་སྲོལ་དེ།
བཅོས་བསྒྱུར་སྒོ་འབྱེད་ལས་ཀྱང་ཧ་ལས་པ་ཞིག་འགྱུར་ངེས།
བོད་ཟླ་དྲུག་པའི་ཚེས་གསུམ་ཉིན་དེ་རིང་རེད།
ངས་ལྷམ་ཡང་མ་གོན་པར་དྲན་པའི་ནང་ལ་ཡང་ཡང་ཉུལ།
མདའ་བཙན་པོ། དངོས་མིང་ལ་ཚེ་རིང་བཀྲ་ཤིས། ༡༩༧༩ ལོར་མདའ་ཚན་དུ་སྐྱེས། སྙན་དེབ་<<མི་རྐྱང་གི་ཕྱི་ནང་>>དང་། <<སྐད་ཆ་བསོར་མོ་རེ་བཤད་ན།>> <<དབུས་ལ་སོང་བའི་སྒྲུང་།>> <<མདའ་བཙན་པོའི་རྩོམ་བཏུས།>> <<ཆོས་པའི་ཤུལ་གྱི་ཁྱིམ་པ་ང་།>> སྒྲུང་རིང་དེབ་<<མཛེས་མ་དང་གཞན་དག་>>བཅས་པར་དུ་བསྐྲུན་ལ། མི་རབས་གསུམ་པའི་ཚབ་མཚོན་སྙན་ངག་པའི་བྱ་དགའ་དང་། གངས་རྒྱན་མེ་ཏོག་སྙན་ངག་བྱ་དགའ། མི་རིགས་རྩོམ་རིག་གི་ལོ་འཁོར་བྱ་དགའ་སོགས་ཐོབ་མྱོང་། སྙན་ངག་སྐོར་ཞིག་དབྱིན་ཡིག་སོགས་ལ་བསྒྱུར་ཞིང་། འགའ་རེ་སློབ་ཆེན་གྱི་བསླབ་དེབ་ཁྲོད་དུ་བདམས་ཡོད།
No comments:
Post a Comment