ང་རང་ནི་སྤྱིར་ན་དྲ་ཉུལ་བྱེད་རྒྱུར་ཉུང་ཞིང་། དེའི་ཁར་དེང་སང་གི“མགྱོགས་འཕྲིན”ཟེར་བ་དང“འདར་དབྱངས”ཟེར་བ་སོགས་ཀྱང་མེད་པས་གསར་འགྱུར་མང་པོ་ཞིག་ནི་རྣ་བའི་ཡུལ་དུ་ཐོས་ཀྱི་མེད། ཟླ་སྔོན་མར་རེབ་གོང་དུ་གྲོགས་པོ་ཞིག་གི་རྩ་ནས“འཛམ་གླིང་སྟེང་ཆེས་ཆེ་བའི་བོད་ཞུན”སྐོར་གྱི་གནས་ཚུལ་དག་ཐོས་པ་དང་། ཞོར་ལ་ཁོང་གིས་བོད་ཞུན་དྲིལ་སྒྲོག་གི་བརྙན་དང་པར་བཅས་པའང་གསལ་པོར་བསྟན་བྱུང་།
ལོ་འདི་ཚོར་བོད་ཡུལ་དུ་འཛམ་གླིང་སྟེང་ཆེས་ཆེ་བ་དང་། ཆེས་རིང་མོ་དང་། ཆེས་ཐོག་མ་སོགས་སྔར་བྱུང་མ་མྱོང་བ་མང་པོ་ཞིག་བྱུང་དང་འབྱུང་གི་ཡོད་དེ། དཔེར་ན། ཆེས་ཆེ་བའི་བོད་ཞུན་དང་ཆེས་ཆེ་བའི་སྦྲ་ནག ཆེས་ཆེ་བའི་རྡོ་འབུམ་དང་ཆེས་རིང་བའི་ཞལ་ཐང་། ཆེས་ཆེ་བའི་གོ་རེ་དང་ཆེས་རིང་བའི་གསེར་བྲིས་སོགས་ལྟ་བུའོ། །
རང་རེ་རྣམས་ནི་ནམ་ཡང་ཆེན་མོ་དང་ཆེན་པོ་ལ་ཤིན་ཏུ་རབ་ཏུ་དགའ་བ་ཞིག་འདུག་སྟེ། བསང་ཞིག་ཕུད་ནའང་སྤྱི་བསང་ཆེན་མོ་ཟེར་ལ། ལབ་ཙེ་ཞིག་བསྟད་ནའང་ལབ་ཙེ་ཆེན་མོ་ཟེར། དཔེ་ཆ་སྲབ་མོ་ཞིག་བརྩམས་ནའང་བསྟན་བཅོས་ཆེན་མོ་ཟེར་ལ། ཟློས་གར་ཚན་པ་ཞིག་འཁྲབ་ནའང་ཟློས་གར་ཆེན་མོ་ཟེར། འགྲན་སྡུར་ག་གེ་མོ་ཞིག་སྤེལ་ནའང་འགྲན་སྡུར་ཆེན་མོ་ཟེར་ལ། དགོང་ཚོགས་ག་གེ་མོ་ཞིག་བསྡུས་ནའང་དགོང་ཚོགས་ཆེན་མོ་ཟེར། ཐ་ན་སློབ་གྲོགས་བཅུ་ཁ་ཞིག་འཚོགས་ནའང་དེ་ལ་དགྱེས་འཛོམས་ཆེན་མོ་ཟེར་རོ། །
དེས་ཀྱང་ག་ལ་ཚད་དེ། མཁས་པ་ཆེན་པོ་དང་སློབ་དཔོན་ཆེན་མོ། ལོ་ཙཱ་བ་ཆེན་མོ། སློབ་གསོ་བ་ཆེན་མོ། ཞིབ་འཇུག་པ་ཆེན་མོ། སྒྱུ་རྩལ་པ་ཆེན་མོ། སྙན་ངག་པ་ཆེན་མོ། ཡིག་མཁན་ཆེན་མོ་སོགས་ཟེར་བ་དང་། ཡང་མགྲོན་ཁང་ཆེན་མོ་དང་ཚོང་ཁང་ཆེན་མོ། དཔེ་ཁང་ཆེན་མོ། ཟ་ཁང་ཆེན་མོ། ཨར་ཁང་ཆེན་མོ། གླུ་གར་ཁང་ཆེན་མོ་ཟེར་བ་སོགས་བགྲང་གིས་མི་ལང་བ་ཡོད་དོ། །
གཞན་ཡང་ཨང་དང་པོ་དང་རྩེ་གྲ་ལ་སྙེག་རྒྱུ་དེའང་མ་གཞི་ནས་ང་རང་ཚོ་ཆེས་དགའ་ས་མོས་ས་ཞིག་ཡིན་ཏེ། ཤོམ་ར་བྱས་ན་འཛམ་གླིང་གི་ཨང་དང་པོ་ང་རང་ཚོ་ཡིན་དགོས་པ་ཡོད་ལ། རྡུང་ལེན་བླངས་ནའང་འཛམ་གླིང་གི་རྩེ་གྲ་ང་རང་ཚོ་ཡིན་དགོས་པ་ཡོད། དེ་བཞིན་དུ་བོད་ཞུན་བཟོས་ན་འཛམ་གླིང་གི་ཨང་དང་པོ་ང་རང་ཚོ་ཡིན་དགོས་པ་ཡོད་ལ། སྙན་ངག་བྲིས་ནའང་འཛམ་གླིང་གི་རྩེ་གྲ་ང་རང་ཚོ་ཡིན་དགོས་པ་ཡོད། ཡ་མཚན་པ་ཞིག་ལ། རང་ཅག་གིས་ལས་དང་བྱ་བ་གང་ཞིག་བསྒྲུབས་ཀྱང་། ཡང་མིན་ན་འཛམ་གླིང་གི་ཨང་དང་པོ་ཡིན་དགོས་པ་དང་། ཡང་མིན་ན་གངས་ལྗོངས་ཀྱི་ཨང་དང་པོ་ཡིན་དགོས་པ་ཡོད།
འཛམ་བུ་གླིང་གི་ཨང་དང་པོ་དང་འཛམ་གླིང་གི་ཆེས་ཆེན་པོ། བོད་གངས་ཅན་གྱི་ཨང་དང་པོ་དང་གངས་ལྗོངས་ཀྱི་ཆེས་ཆེན་མོ་སོགས་མཐོང་ན“སྐྲག་སྙིང་ཡོང”ཞིང་ཐོས་ན“བ་སྤུ་གཟེང”བའི་ཚིག་འདི་དག་བོད་མི་རེ་རེའི་ཁ་ལ་བྱང་འདུག་པ་དང་། སུ་དང་གང་ཡང་འདི་ལྟར་སྨྲ་བར་འཚེར་སྣང་དང་འཛེམ་དོགས་ཅི་ཡང་མེད་པ་ཡིན་ནོ། །
དྲང་མོར་བཤད་ན་རང་མི་རང་ལ་རྒྱུས་ཡོད་པ་དང་། རང་ཡུལ་རང་ལ་རྒྱུས་ཡོད་པས་ཅིག་གི་ཨང་དང་པོ་དང་ཉིག་གི་ཆེན་མོ་ཟེར་བ་དག་ཀྱང་འཛམ་གླིང་སྒང་གི་ངེས་པ་དོན་གྱི་ཨང་དང་པོའམ་ཆེན་མོ་རྣམས་དང་བསྡུར་ཚེ། མིང་དོན་མཚུངས་མིན་ནི་བློ་གྲོས་ཅན་སུས་བལྟས་ནའང་གསལ་ལེར་རྟོགས་ཡོང་བ་ཞིག་ཅི་ལ་མིན་ཨང་།
དེ་ཡང་འཇིག་རྟེན་གྱི་ཆོས་ཉིད་དང་དངོས་པོའི་གཤིས་ལུགས་ལྟར་ན། ཐིགས་པ་བསགས་ནས་རྒྱ་མཚོ་ཆགས་པ་དང་། ས་རྡུལ་བསགས་ནས་རི་རབ་འབྱུང་བ་ཡིན་པས་ང་རང་ཚོས་ཐོག་མ་ཉིད་ནས“ཐིགས་པ”དང“ས་རྡུལ”གསོག་པ་ནས་མགོ་རྩོམ་དགོས་ཤིང་། ཡང་ན་ཆེ་ས་ནས་ཆུང་སར་འཇུ་བ་དང་མཐོ་ས་ནས་དམའ་སར་འབབ་རྒྱུ་ནི་ཤིན་ཏུ་ནས་གལ་ཆེ་བར་མཐོང་། དེ་ལས་ལྡོག་སྟེ་ནམ་ཡིན་ཡང་ཆེན་པོ་དང་ཆེན་མོ་དང་རྩེ་གྲ་དང་ཨང་དང་པོ་ཏག་ཏག་ལ་འཇུས་ཤིང་འཐམ་བསྡད་པ་ཡིན་ན། ནམ་ཞིག་རང་ཉིད་འགྱེལ་བ་ལས་འོས་མེད་དོ། །
ཁ་སང་དེ་རིང་། མདོ་སྨད་ཀྱི་ས་ཆ་མང་པོར་བོད་རང་གི་ཟ་ཁང་འབྱེད་པའི་རླབས་ཤིག་འཕྱུར་བཞིན་ཡོད་པ་འདི་ལ་མཚོན་ནའང་། སྦྱིན་བདག་རྣམས་ཀྱིས་མགོ་མ་ནས་ཆེན་པོའམ་ཆེན་མོ་ཞིག་ལ་འབྱར་བའི་བག་ཆགས་མཐུག་པོ་དེ་དོར་ནས། དང་པོར་ཟ་ཁང་ཆུང་ཆུང་མང་དུ་ཕྱེ། བར་དུ་ཞིམ་མངར་ལྡན་པའི་ཁ་ལག་བཟོས། མཐའ་མར་བརྩོན་པ་ཆུ་བོའི་རྒྱུན་བཞིན་བསྟེན་པ་ཡིན་ན། ཇི་སྐད་དུ། ཆར་གྱི་ཐིགས་པ་བསགས་པས་ཀྱང་། །མཐའ་ཀླས་ཆུ་ཡི་དཀྱིལ་འཁོར་ཆགས། །ཞེས་པའི་ཟླ་ལ་འགྲོ་ངེས་སོ། །
མདོར་ན་ལས་དང་བྱ་བ་གང་ཡིན་ཡང་ཐོག་མར་ཆུང་ས་ནས་བཀྲ་ཤིས་པའི་མགོ་རྩོམ་རྒྱུ་ནི། མ་འོངས་པ་ན་ཆེ་ས་ནས་ཕུན་སུམ་ཚོགས་པའི་འབྲས་བུ་འཐོན་པའི་རྒྱུ་རུ་ངེས་ཤིང་། དེ་ནི་ལེགས་ཚོགས་ཐམས་ཅད་ཡར་ངོའི་ཟླ་བཞིན་འཕེལ་ཞིང་རྒྱས་པར་བྱེད་པའི་རྩ་བའང་ཡིན་ནོ། །
ཕྱི་ལོ་2024 ལོའི་ཟླ་9 པའི་ཚེས་2 ལ།
No comments:
Post a Comment