«རྫི་མའི་སྟེང་གི་འཇའ་ཚོན།»『བྱིས་རྩོམ།』

 ཉི་ཧོང་གི་རྩོམ་མཁན་ལྕམ་ཁཱ་ནི་ཁོ་ཡི་བྱིས་རྩོམ་བོད་འགྱུར་མ། 

ལས་བྲེལ་གྱི་བར་གསེང་ནམ་བྱུང་ལ་གུས་པས་རང་སྐད་ཡིག་རིག་གནས་ཀྱི་གནས་སྟངས་སྤྱི་དང་ལྷག་པར་དུ་བྱིས་པའི་རྩོམ་རིག་སྒྱུ་རྩལ་གྱི་སྟོང་ཆ་རེ་སྐོང་ཐབས་སུ་“ཐིགས་པ་བསགས་པའི་རྒྱ་མཚོ་”བཞིན་དུ་ཞབས་འདེགས་ཕན་འདྲོང་ཕྲན་བུ་ཨེ་ཐུབ་སྙམ་པའི་དུང་ཞེན་ཞིག་ཡིད་ལ་བརྣག་སྟེ། ཤར་ཕྱོགས་ཉི་ཧོང་རྒྱལ་ཁབ་ཀྱི་རྩོམ་པ་པོ་གྲགས་ཅན་ལྕམ་མེ་སུ་ཙུ་ཁཱ་ནི་ཁོ་(金子みすゞ)ཡིས་གསར་རྩོམ་མཛད་པའི་<<ཁྱོད་རང་བྲག་ཅ་ཡིན་ནམ་>> དང་། <<རྫི་མའི་སྟེང་གི་འཇའ་ཚོན།>> <<མེ་སུ་ཙུ་ཁཱ་ནི་ཁོ། ཁེར་རྐྱང་གི་སྲས་མོ་ཞིག་གི་མི་ཚེ་དང་སྙན་ངག>> <<ཉི་ཟླ་གཉིས་ཀྱི་ཤུན་ལྤགས།>> <<མཛེས་སྡུག་གི་ཕྱིར་དྲན་>>བཅས་རྩོམ་དེབ་ལྔ་ལས་ལེགས་རྩོམ་ཆིག་བརྒྱ་ལྷག་བདམས་ནས་བསྒྱུར་བསྐྲུན་བྱས་ཡོད། 

རྒྱབ་ལྗོངས་ཀྱི་ཆ་ནས། སྙན་རྩོམ་མང་ཤོས་བྱིས་པའི་སློབ་གསོ་དང་འབྲེལ་ལ། བྱིས་སེམས་ཀྱི་དགའ་སྐྱོ་ཆགས་སྡང་དང་ཡང་འབྲེལ་བའི་ཡ་རབས་བཟང་སྤྱོད་དང་བྱམས་བརྩེ་དྲིན་གཟོ། རང་དབང་དྲང་བདེན། འདྲ་མཉམ་བརྩི་བཀུར། འགན་འཁྲི་དཀྱེལ་ཡངས། ཕུགས་བསམ་ཧུར་བརྩོན། རང་རྟེན་སྒེར་ཚུགས། མཛའ་མཐུན་རོགས་རེས་སོགས་བརྗོད་སྙིང་གཙོ་བོར་གྲུབ། 

ལྟ་དགོངས་ཀྱི་ཆ་ནས། རྩོམ་པ་པོས་འཇིག་རྟེན་ཁམས་ཀྱི་འགྲོ་བ་མི་གཅིག་པུ་ཙམ་མ་ཟད་སྐྱེ་དངོས་རྒྱུ་བ་ཕྲ་རགས་ཐམས་ཅད་པོར་འགྲོ་བ་མི་ནང་བཞིན་གྱི་སྐྱེ་འཆི་ཡི་བླ་སྲོག་དང་བདེ་སྡུག་གི་ཚོར་ཤེས་བདོག་པར་ངོས་འཛིན་ལ། དེ་ནི་དཔེར་ན་བྱིས་རྩོམ་འདི་དག་ནང་གསལ་གྱི་ཉི་ཟླ་འཆར་ནུབ་དང་ཁངས་ཆར་འབབ་ཐང་། འཇའ་འོད་འཕྲོ་འདུ་དང་མེ་ཏོག་བཞད་རྙིད། རི་བྲག་གི་ཆགས་རིམ། རྩི་ཤིང་སྐྱེས་སྐམ། རླུང་ལྡང་བ་དང་གློག་འགྱུ་བ་དང་ཆུ་བཞུར་བ་དང་རྩྭ་སྐྱེ་བ་ལ་དང་ཆར་འབབས་པ་དང་མེ་འབར་བ་ལ་སོགས་པ་འགྲོ་བ་སེམས་ཅན་གྱི་བྱ་སྤྱོད་དང་མཚུངས་པར་ཐུགས་གཞིག་དང་གསར་རྩོམ་གནང་འདུག་པ་ལས་རྟོགས་ཐུབ།

བསྒྱུར་ཐབས་ཀྱི་ཐད་ནས། འགྱུར་དེབ་འདིའི་མ་རྩོམ་ཉི་ཡིག་དང་དབྱིན་ཡིག་ཤན་སྦྱར་གཞིར་བྱས། ཐོག་མར་དབྱིན་ཡིག་ནས་བོད་ཡིག་ཏུ་བསྒྱུར་རྗེས། སླར་ཡང་དབྱིན་འགྱུར་དང་བོད་འགྱུར་གཉིས་ཀ་ཉི་ཡིག་གི་མ་རྩོམ་ལ་ཁུངས་གཏུག་དག་སྒྲིག་བྱས་ལ། དོན་སྒྱུར་དང་ཐད་སྒྱུར་ཟུང་དུ་སྦྲེལ་ཏེ་མ་ཡིག་གི་སྐད་ཆའི་སྒྱུ་རྩལ་ལམ་ཉམས་འགྱུར་དང་དབྱངས་རྟ་གཙོ་སྙིང་དུ་འཛིན་པའི་ཐབས་སུ་འབད་ཡོད།

དགོས་དམིགས་ཀྱི་སྐོར་ནས། འགྱུར་དེབ་འདིས་ཁ་མིག་ཡར་ལྟ་བྱེད་སའི་དེང་གི་རང་རེའི་ལོ་ཙཱའམ་རིག་གནས་ནང་འདྲེན་གྱི་གནས་བབ་ཤིན་ཏུ་ནས་ཞན་པའི་གནས་སྟངས་འདིའི་འོག་ནས། མ་འོངས་བོད་ཀྱི་བྱིས་པར་རྩོམ་ཡིག་འབྲི་སྦྱོང་དང་ཡིག་སྒྱུར་གྱི་མོས་པ་བསྐྱེད་ཐབས། བྱིས་པའི་ཀུན་རྟོག་གི་བློ་སྒོ་འབྱེད་ཐབས། ཡང་སྒོས་སུ་བོད་སྐད་ཡིག་བཀོལ་སྤྱོད་ཀྱི་ནུས་པ་མཐོར་འདེགས་གཏོང་ཐབས་དང་། བྱིས་པར་དཔེ་ཀློག་གི་གོམས་སྲོལ་རྒྱུན་འཁྱོངས་ཡོང་ཐབས་བཅས་སུ་ཕན་པའི་འབྲས་བུ་ཕྲན་ཙམ་ཨེ་འཐོན་ལ་བརྩོན་པའི་ཁུལ་ཡིན།

འགྱུར་དེབ་འདི་འགྲེམ་སྤེལ་མཛད་སྒོ་དང་འབྲེལ་བའི་འདྲ་པར་འགའ། བལ་ཡུལ་༼ ནོར་བཟང་དཔེ་ཁང་། ༽