བཙོན་ར་ལྟ་བུའི་ཕ་ཡུལ།
སྔོན་ཆད་ཕ་ཡུལ་བདུད་ཀྱི་བཙོན་ར་ཡིན་གསུངས། དེང་སང་ཕ་ཡུལ་ཇི་འདྲ་བ་ཞིག་ཡིན་ནམ།
ཉིན་ཞིག་ཁོང་ལས་བྱེད་པ་རྣམས་ཀྱིས་བོས་ནས་བཙོན་བཀྲོལ་བཏང་བ་ཡིན་ཟེར།བཙོན་བཀྲོལ་བཏང་བ་འདི་ཁོང་ལ་མཚོན་ན་ཤིན་ཏུ་སྤྲོ་བའི་དོན་ཞིག་ཡིན་མོད།
ཁོང་ལ་སྤྲོ་བ་དང་མཉམ་དུ་སེམས་ཁྲལ་ཞིག་ཀྱང་སྐྱེས་བྱུང་།
ང་གང་ལ་འགྲོ་འམ།དགོན་པར་འགྲོའམ།ཕ་ཡུལ་དུ་འགྲོ།
ལོ་གེའི་ནང་དུ་སྡོད་དུས་དགོན་པའི་གནས་ཚུལ་ཐར་ཐོར་རེ་གསན་ཞིང་།
དགོན་པ་སླར་གསོ་བྱེད་པ་ཆེས་དཀའ་བ་ཤེས་ཡོད། དེ་བས་ཕ་ཡུལ་དུ་འགྲོ་བ་ལས་ཐབས་མི་འདུག་སྙམ།
ལྷག་པར་བཙོན་བཀྲོལ་གཏོང་དུས་ལོ་གེའི་ལས་བྱེད་པས་ཕ་ཡུལ་ལ་འགྲོ་དགོས་ཞེས་སྲིད་གཞུང་ལ་ངོས་སྦྱོར་གྱི་ཡི་གེའང་བྲིས་འདུག་པས་མཚོ་བྱང་མདའ་བཞི་ལ་ཕེབས་པའི་ལམ་དུ་ཕ་ཡུལ་གྱི་གནས་ཚུལ་གང་འདྲ་ཞིག་ཡིན་ནམ་སྙམ་ནས་སོམ་ཉི་དང་བཅས་པས་ཕེབས།
ཕྱིར་ཕ་ཡུལ་དུ་སླེབས་དུས་སྲིད་ཇུས་ཅུང་གུ་ཡངས་སུ་སོང་སྟེ།
བོད་ཀྱི་ས་ཆའི་རྫོང་རེ་རེར་དགོན་པ་རེ་ཡང་སླར་གསོ་བྱས། མི་རྣམས་ཀྱིས་སྲིད་ཇུས་འདི་ནི་ལིག་ཧྲོ་ཆིའི་སྲིད་ཇུས་ཡིན་ཟེར།
འོན་ཀྱང་རྒྱལ་ཡོངས་ལ་ལྷང་ངེར་མངོན་པའི་གུ་ཡངས་ཀྱི་སྲིད་ཇུས་དེ་ད་དུང་མདའ་བཞི་ན་ཅི་ཡང་མི་མངོན།
ཁོང་ཕ་ཡུལ་དུ་སླེབས་ནས་ལས་ཀ་གཞན་ཅང་མེད་ནའང་ཕྱི་རྒྱལ་གྱི་གསང་ཉུལ་བ་ཞིག་སླེབས་པ་ཇི་བཞིན་ལས་བྱེད་པ་དག་གིས་དོགས་ཟོན་ཆེན་པོས་ཕྱི་བསྐོར་ནང་བསྐོར་བྱེད།
ཁོང་དེ་དག་གིས་ཐུགས་སུན་ཞིང་། ས་གནས་གཞན་དང་གཞན་ནས་དགོན་པ་རེ་འགས་སླར་ཡང་ཆོས་སྒོ་ཕྱེས་པའང་ཐོས་པས་ཕྱིར་ཐར་ཤུལ་དགོན་པར་ལོག་སྟེ་དགོན་པ་སླར་གསོ་བྱས་ན་ཅི་མ་རུང་སྙམ།
དེ་ནི་སྨོན་པ་ཙམ་ཡིན། ཁོང་ལ་རྒྱབ་སྐྱོར་བྱེད་མཁན་མེད་ལ་བློ་འདྲི་ས་ཞིག་ཀྱང་དཀོན།
_______ཕུལ་བྱུང་རིག་གནས་ཁང་།
No comments:
Post a Comment