ཕྱིར་དྲན་གྱི་གཤོག་རྡེབ། | གསར།

| ཕྱིར་དྲན་གྱི་གཤོག་རྡེབ།

『རྩོམ་མཁན་ཨེ་ཌོ་ནེ་སི། སྒྱུར་མཁན་ན་བུན།』

༡

ཁྱོད་ཀྱི་བྱིས་དུས། རི་གྲོང་ཞིག་ཡིན་དུ་ཆུགས།

ཁྱོད་གཅིག་པུར། རྒྱང་ནས་རྒྱང་དུ་ཆས་ཀྱང་།

སྡེ་གྲོང་གི་རྒྱལ་མཚམས་བརྒལ་མི་སྲིད།  

༢

ང་ཡང་རི་གྲོང་ཞིག་ཏུ་སྐྱེས།

དེ་ནི་བུ་སྣོད་ཅིག་དང་འདྲ་བར། 

ཧ་ཅང་དོག་ཁར། ཧ་ཅང་གསང་རྒྱ་དམ་པས།

ང་ཐར་ཐབས་ཤིག་ཡེ་མ་བྱུང་ངོ་།།

དེ་ལྟ་ནའང་། ང་ནི་རབ་མེད་གཙང་པོར་དུངས།

༣

ང་ཡི་ཉིན་མོ་མཚན་མོ། མཚེའུ་ལྟར་མེར་ཏེ། 

ང་ཡི་ཕྱིར་དྲན་མ་ལུས་སྐྱོམ་གྱི་འདུག 

༤

མཚན་མོ། མེ་ལྕེ་གཞན་པ་ཞིག་རེད།

སྲོད་ཀྱི་ཡུལ་གར། ལག་པས།

སྟོང་བའི་དབྱིངས་སུ། གསང་འཕྲིན་སྤྲིང་དུས།

སྐྱི་སེར་རླུང་གི་ཕུང་པོ་ལས་བྲག་ཅ་མཆེད་ཀྱི་འདུག  

རླུང་། རང་ཉིད་ཤིང་རྟར་གྲུབ་སྟེ།

ཕྱི་མ་ལེབ་ཀྱིས་དྲུད་ནས་སོང་ན་འདོད།

༥

བརྩེ་དུང་དང་། གཉིད་ལམ། གཡས་སྐོར་གཡོན་སྐོར་གྱི་ཟླ་རྟགས་གཉིས་རེད།

དེ་ཡི་དབར་དུ། ང་ཡི་ཕུང་པོ་སྦེད་དེ།

གཞི་ནས་འཇིག་རྟེན་རྟོགས་སོང་།

ཟླ་འོད་དང་། བགྲེས་པོ།

དེ་ཡི་གནས་མལ་མཚན་མོ་རེད།

དེ་ཡི་ལག་རྟེན་འོད་ཞགས་རེད།

༦

ཐེངས་མང་པོར། ང་ཡི་མྱིག་ལམ་དུ།

རྩྭ་ཡི་རྐང་པ་ཐོགས་པའི་མཁའ་རླུང་འཕུར་ཏེ། 

རླུང་གི་རྐང་པ་རྡུང་བའི་མཁའ་ལམ་གར་ལ་རྩེན།

གལ་ཏེ་ཟླ་བ་ཕྱེད་ཀ ཁང་པ་ཧྲིལ་བོ་ཞིག་ཡིན་རུང་།

ང་ཡི་རྐང་པ། དེ་ཡི་སྒོ་ཁར་རྩེབས་མི་སྲིད།

༧

ཆུ་ངོགས་ནས། ངས་ཕྱི་ནང་མཐོང་ཐུབ་པའི་མེ་ལོང་ཞིག་རྡུང་སྟེ།

དེ་ལ་རང་ཉིད་ཀྱི་སྐྱོ་གདུང་ཡང་དྲིས།

ངས་ད་དུང་སྤྲིན་ལ་ཅེར་ནས། 

སྡུག་གི་ཆར་ཆུ་ཕངས་མེད་བསྙིལ།

༨)

དུས་ཚོད་ནི་རྒྱ་སྒོ་ཞིག་སྟེ།

ངས་འབྱེད་ཐབས་མ་བྱུང་།

ང་ཡི་སྒྱུ་རྩལ་གྱི་ནང་སེམས་རལ་ནས།

ང་ཡི་གདུང་དབྱངས་ཀྱི་མགྲིན་པ་བརྣངས་བྱུང་།

ཟུར་མཆན།

| ཁོང་གི་<<སྙན་ངག་གཅེས་བཏུས་>>ལས་བསྒྱུར། ཁ་བྱང་སྒྱུར་བ་བོས་བཏགས།

༢/ ༢༠༢༣/