ཕ་བུ་ཁ་བྲལ་གྱི་དོ་དམ།_____
ཁྱུང་མཆུ་རྫོང་བོད་ཡིག་སློབ་འབྲིང་།
______སློབ་མ་བཙཱོན་མ་མིན།
ཕ་མ་བུ་རྒྱུད་ངོ་ཐུག་མི་ཐུབ་པ་བཟོས་ན་དོ་དམ་ཡིན་ནམ།
བདག་གི་བྱས་པ་གཉིས་སྨན་པར་སྟོན་དགོས་ཐུག་པར། རྔ་བ་ཁུལ་ཁྱུང་མཆུ་རྫོང་བོད་ཡིག་སློབ་འབྲིང་གི་རྒྱ་སྒོ་རུ་སླེབས་པ་ན། ནང་དུ་མི་གཏོང་། སྒོ་སྲུང་གིས་གནང་པ་ཞུ་དགོས་ན་འཛིན་བདག་དགེ་རྒན་ལ་ཁ་པར་ཐོངས། ཁྱིམ་བདག་གི་ཐོབ་ཐང་དཔང་ཡིག་བསྐྱར་དཔར་དགོས་ཟེར། དགེ་རྒན་ལ་ཚོགས་ཐུག་ཡོད་པས་ཡིན་ནམ་ཁ་པར་མི་ཉན། སྒོ་སྲུང་ལ་བུ་ཕྲུག་འདིར་འབོད་པའི་ཐབས་ལམ་གཞན་པ་ཡོད་དམ་ཞེས་པར། མེད་ཟེར།
ཁ་སང་ཕྱི་ལོ་༢༠༢༤ ཟླ་༧ ཚེས་༢༡ ཉིན་བྱིས་པ་སྨན་པར་སྟོན་དགོས་པར། གཟའ་མཇུག་ཡིན་པས་འཛིན་བདག་དག་རྒན་ལ་ཁ་པར་མི་འཕྲོད། ལས་འཛིན་སློབ་གཙོ་གཞོན་པར་ཁ་པར་བཏང་ནས་གནས་ཚུལ་ཞུ་རྩིས་བྱས་པར། ང་ལ་ཁ་པར་བཏང་ནས་ཅི་བྱེད། འཛིན་བདག་ལ་ཁ་པར་ཐོངས། ཞེས་ཚིག་རྩུབ་དང་སྐད་གདངས་དྲག་པོས་བཤད་མཚམས་བཅད་ནས་ཁ་པར་སྒོ་བརྒྱབ།
ཡར་སྔོན་ཞིག་ཏུ་ངའི་གྲོགས་པོའི་བུ་ཆུང་ལ་ཟུག་གཟེར་མྱུར་མོའི་ནད་བྱུང་བར། སློབ་གྲྭའི་ནང་དུ་མ་བཏང་བས་ཉེན་ཁ་དང་དཀའ་ངལ་ཆེན་པོ་འཕྲད་སོང་ཟེར། འཕྲལ་དུ་བཅོས་དགོས་པའི་ནད་གཅིག་པུ་ལ་བསམ་ན། རྒྱུ་མཚན་སྟོང་ཕྲག་བགྲང་དུ་མཆིས་ཀྱང་ཕ་མ་བུ་རྒྱུད་འཕྲད་མི་ཐུབ་པ་བཟོས་པ་ནི་དོ་དམ་བྱེད་ཐབས་ཤིག་ཏུ་འདོད་ཐབས་མེད།
དུས་རྒྱུན་སློབ་གྲྭའི་རྒྱ་སྒོ་ལ་སླེབས་ན། ཕ་མ་མང་པོ་བུ་རྒྱུད་ལ་ཐུག་མ་ཐུབ་པར་སྒུག་བཞིན་མཆིས། དོན་དག་ཆེ་ཆུང་ཅི་མཆིས་ཀྱང་། ཐོབ་ཐང་དཔང་ཡིག་ལག་ཏུ་བཟུང་། ཕ་མ་ངོ་མ་སླེབས། འཛིན་བདག་དགེ་རྒན་ལ་ཁ་པར་འཕྲོད་ཐབས་མེད་རུང་། ནང་དུ་མི་གཏོང་མོད། ནང་དུ་གཉེན་ཉེ་དང་གྲོགས་པོ་མཆིས་ན་མགྲོན་དུ་གཏོང་། གསལ་པོར་བཤད་ན་མི་འབྲེལ་མེད་པའི་ཕ་མ་མ་གཏོགས་གཞན་པ་ཚོ་ཚོད་འཛིན་མི་ཐུབ་པས། དོ་དམ་དེ་མངོན་དུ་བདེན་པ། ལྐོག་ཏུ་རྫུན་པར་ཆགས་ཟིན་པ་ཧ་ཅང་གསལ།
ང་ཚོ་ཕ་མ་ཚོར་སློབ་གྲྭའི་ནང་དུ་བུ་རྒྱུད་ཀྱི་སློབ་སྦྱོང་གནས་ཚུལ་དང་། འཚོ་བའི་བཟང་ངན། འགྲིག་ལམ་གྱི་ལེགས་ཉེས་ལ་ལྟ་རྟོག་བྱེད་པའི་ཁྲིམས་ཀྱི་འོས་འགན་གཙང་མ་ཡོད་པ། འདི་ལྟར་སློབ་གྲྭའི་འགན་འཛིན་པས་ཅི་མི་སྙམ་པར་མེད་པར་བཏང་བ་ཁྲིམས་འགལ་ཡིན། ཁྲིམས་སྐྱོང་ནི་ང་ཚོའི་རྒྱལ་ཁབ་སྔོན་ཐོན་དང་འཕེལ་རྒྱས་འགྲོ་བའི་ཁག་ཐེག་ཡིན། འབྲེལ་ཡོད་ཚོས་ལེགས་བཅོས་གཏོང་བར་འབོད་སྐུལ་ཞུས་པ་ཡིན།
ཕྱི་ལོ་༢༠༢༣ ལོའི་ཟླ་བདུན་པའི་ཟླ་མཇུག་ཏུ་བདག་གི་བུ་རྒྱུད་གཉིས་སློབ་གྲྭ་འདི་ལ་གསར་དུ་ཞུགས་སྐབས། དམག་སྦྱོང་གི་ལྭ་བ་ཉོ་རིན་ལ་སྒོར་བདུན་ཅུ་དོན་ལྔ་བསྡུས། རྗེས་སུ་དམག་སྦྱོང་མ་བྱས་ལ་ལྭ་བ་མ་སྤྲད། ཁྱིམ་བདག་ཚོགས་པའི་ནང་དུ་དོན་དེ་ཞུ་མཁན་མང་པོ་བྱུང་མོད་ཨ་ལན་སྟེར་མཁན་མ་བྱུང་། སྒོར་མོ་དོན་ལྔ་ཟེར་ན་གྲངས་ཀ་ཆེན་པོ་མིན་མོད། སློབ་མ་དྲུག་བརྒྱ་ལྷག་གི་སྒོར་སྤྱི་བསྡོམས་བྱས་ན། ཁྲི་བཞི་ནས་ལྔ་ལ་ཉེ་བ་ཞིག་རེད། རུལ་སུངས་ནི་ང་ཚོའི་རྒྱལ་ཁབ་ཀྱིས་མཐའ་གཅིག་ཏུ་ངོ་རྒོལ་དང་། མང་ཚོགས་ཀྱི་ཁེ་ཕན་དང་བདེ་སྡུག འདྲ་མཉམ། དྲང་བདེན་སོགས་སྲུང་བ་ནི་སྤྱི་ཚོགས་རིང་ལུགས་ཀྱི་རྩ་བའི་རིན་ཐང་ལྟ་བ་དང་། ཀྲུའུ་ཞུ་ཞི་ཅིན་ཕེན་གྱིས་དུས་རབས་གསར་བའི་དགོངས་པའང་ཡིན།
ཕ་མ་ཚོས་གཉོམ་ཁུར་ནས་བསམ་འཆར་མི་བཤད་དོན། དགེ་རྒན་ཚོས་བྱིས་པར་ལྟ་ཚུལ་ངན་པ་འཆང་བར་སྐྲག་པ་ཡིན། གལ་སྲིད་དེ་འདྲ་བྱུང་ན། ཁྲིམས་ཁང་ལ་གཏུགས་ནས་རང་གི་ཁེ་ཕན་སྲུང་སྐྱོབ་དང་། འདྲ་བདེན་རྩོད་པ་སྤྱི་ཚོགས་ཡོངས་ལ་འགན་འཁུར་ཚུལ་ཡིན་པས་མཉམ་དུ་འབད་བརྩོན་ཡོང་བའི་འབད་སྐུལ་ཞུ།
______གསོན་མིང་བས།
༢༠༢༤ / ༧ / ༢༢
No comments:
Post a Comment