ལོ་འདི་འགར་ཁོ་བོ་མྱ་ངམ་གྱི་བྱེ་ཐང་འདིར་སྨྲ་བ་བསྡམས་ནས་བསྡད་ཡོད།
____མེ་ཏོག་འགའ་ཞི་གི་སླད་དུ།
དྷི་ལྷ་ལྡན།
ཁོ་བོས་ལོ་འདི་འགར་མྱ་ངམ་གྱི་བྱེ་ཐང་ཞིག་ནས་ཉིན་ཞག་སྐྱེལ་གྱིན་ཡོད། ཐལ་རྡུལ་དང་བྱེ་རླུང་གིས་མོག་པོར་བསྒྲིབས་པའི་ཁོར་ཡུག་འདི་རུ་བསམ་མེད་སུ་ཞིག་གིས་ཡིད་དུ་འོང་བའི་མེ་ཏོག་འགའ་དོར་འདུག་ལ། ཆུ་ཐིགས་ཕྲན་ཙམ་ཡང་མེད་པའི་བྱེ་ཐང་འདི་ནས་མེ་ཏོག་དེ་དག་གི་ཁ་དོག་ལ་སེར་ཐིག་ལྷུང་འདུག
ངས་སྐོམ་གྱིས་གདུང་བའི་མེ་ཏོག་རེ་རེའི་ཁ་རུ་ཆུ་ཐིགས་ཕྲན་ཙམ་ལྡུད་པར་གཅིག་ཏུ་འབད་ནའང་། གདུག་ལྡན་སུ་ཞིག་གིས་ནག་དྲེག་བྱུགས་པ་ལྟ་བུའི་ཁོར་ཡུག་འདི་ནས། མེ་ཏོག་རེ་རེའི་ཞལ་རས་ཀྱང་གསལ་བོར་མཐོང་མི་ནུས་པས་ནུས་ཤུགས་རྡུགས།
ཆེས་མཛེས་སྡུག་ལྡན་པའི་མེ་ཏོག་གི་འདབ་མ་རེ་རེ་མྱ་ངམ་གྱི་བྱེ་ཐང་དུ་དོར་བ་ནི། འཇིག་རྟེན་གྱི་མཛེས་པ་མཐའ་དག་གད་སྙིགས་ཀྱི་ཁྲོད་དུ་བོར་བ་དང་གཉིས་སུ་མ་མཆིས་པའི་ནག་ཉེས་བདོག་ནའང་། ལྷག་བསམ་གྱི་དྲི་མ་དང་བྲལ་ཞིང་། ཧམ་སེམས་ཀྱི་ཚེར་ལག་རིང་བའི་དུག་སྡོང་འགའ་རེས་ཆེད་དུ་མེ་ཏོག་དེ་དག་བྱེ་ཐང་འདིར་དེད་ནས་ཚོང་ཟོང་དུ་བསྒྱུར།
མཛེས་སྡུག་ལྡན་པའི་མེ་ཏོག་གི་འདབ་ལོ་རེ་རེ་བྱེ་ཐང་གི་རྡུལ་རླུང་ཁྲོད་ནས་མཁའ་རུ་སྤུར་གྱིན་ཁོ་བོ་ལྷག་བསམ་རྣམ་དག་ཡིན་ནོ་ཞེས་སྐྱོ་ལབ་གཏོང་། ཁོ་ཚོའི་བྱ་སྤྱོད་དེས་མི་རབས་ཤིག་དང་། མི་རིགས་ཤིག་གི་སྲོག་རྩ་ལ་སྦར་སྡེར་སྣོན་གྱིན་ཡོད་ནའང་། ཁོ་ཚོས་ད་དུང་རང་ཉིད་ནི་མཁའ་དབྱིངས་ན་རྒྱུ་བའི་སྐར་མ་འོད་ཆེན་ཞིག་གི་ཉམས་སྣང་བཏོད་ཀྱིན་སྤུ་མེད་ཕག་པའི་ངང་ཚུལ་སྟོན། མི་རབས་ཤིག་གི་ཆེས་འཇིགས་སུ་རུང་བའི་ཟིན་ཐོ་འདི་དག་སུ་ཞིག་གིས་འབྲི་བར་ནུས་ཨང་།
ད་ལོ་མྱ་ངམ་གྱི་བྱེ་ཐང་འདིར་ཤེས་རིག་གི་འདབ་ལོ་མ་རྙིང་ཞིང་། ལྷག་བསམ་གྱི་དྲ་དང་མ་བྲལ་བའི་སྡོང་བོ་ཞིག་གསར་དུ་འབྱོར། ཁོས་ང་དང་ལྷན་དུ་མེ་ཏོག་གསར་བ་ཚོའི་ཁ་རུ་ཆུ་ཐིགས་ཕྲན་ཙམ་ལྡུད་པར་གཅིག་ཏུ་འབད།
གསར་དུ་འབྱོར་བའི་སྡོང་བོ་དེས་སྐབས་རེར་རང་གི་ཡལ་འདབས་ལ་རྩེད་འཇོར་རོལ་བའི་བྱིས་པ་ཚོར་བལྟས་ནས་ལྷུག་ལྷུག་ཏུ་དགོད་ཅིང་། ལན་རེར་རླན་བྲལ་བྱེ་ཐང་ལྟ་བུའི་མྱ་ངམ་གྱི་ཐང་དང་། དེ་རུ་སྐོམ་གྱིས་གདུང་བའི་མེ་ཏོག་ཚོར་བལྟས་ནས་ཡིད་སྐྱོ་བའི་ཆིག་ལབ་བརྒྱབ།
གང་ལྟར་ང་ད་དུང་བྱེ་ཐང་ལྟ་བུའི་མྱ་ངམ་གྱི་ཐང་དེ་ན་ཡོད། མྱ་ངམ་གྱི་ཐང་དེ་ནས་མེ་ཏོག་འགའ་ལ་ཡིད་སེམས་འཁྲེང་ནས། རང་ཉིད་ཀྱི་སྒྲུབ་དགོས་པ་མང་པོ་ཞིག་དོར་ཞིང་། རང་ཉིད་ཀྱིས་འབྲི་དགོས་པ་མང་པོ་ཞིག་བསྐྱུར་ནས། སྨྲ་བ་བསྡམས་ཏེ་མེ་ཏོག་དེ་དག་བསྐྱངས་ནས་བསྡད་ཡོད།
No comments:
Post a Comment