ཨ་མདོ་བའི་ཧོར་རྩིས་དང་རྒྱ་ནག་ཞིང་རྩིས་གཉིས་དོན་ལ་གཅིག་རེད།
ཨ་སྐྱབས་མཁན་པོ།
ནང་སོག་གིས་ཀྱང་རྒྱ་ནག་ཞིང་རྩིས་ལྟར་ལོ་སར་གི་ཡོད། འོན་ཀྱང་མོང་གྷོལ་རྒྱལ་ཁབ་ཀྱིས་བོད་རྩིས་ལྟར་ལོ་སར་རོལ་གི་ཡོད།མདོར་ན་ཨ་མདོ་བས་བཤད་ཀྱིན་པའི་ཧོར་རྩིས་དེ་ལོ་རྒྱུས་ནང་གི་ཧོར་རྩིས་ངོ་མ་བོ་མ་རེད།
མོང་གྷོལ་རྒྱལ་ཁབ་ཀྱི་ཧོར་རྩིས་གསར་བ་དེའང་དེ་བས་ཀྱང་མ་རེད། དེ་ན་རྒྱ་ནག་ཞིང་རྩིས་ནི་ལོ་རྒྱུས་ཐོག་ལེགས་བཅོས་མང་པོ་བྱས་མྱོང་བ་ཞིག་ཡིན། ཏ་མིང་རྒྱལ་རབས་ཀྱི་སྐབས། ནུབ་ཀྱི་ཡེ་ཤུ་ཆོས་སྤེལ་བ་མང་པོ་རྒྱ་ནག་ཏུ་ཡོང་ནས་རྒྱའི་ཞིང་རྩིས་ལ་དགག་རྒྱག་བྱེད་འགོ་བརྩམས།
ཁོང་ཚོས་རྒྱལ་པོའི་མདུན་ནས་ཐེངས་མང་པོར་ཉི་འཛིན་དང་ཟླ་འཛིན་བརྟག་པར་འགྲན་བསླངས་པས་སྐབས་དེའི་རྒྱ་ནག་གི་ཞིང་རྩིས་པ་མང་པོ་ཡང་ཡང་ཕམ། མཐར་ཏཱ་མིང་རྒྱལ་པོས་རྒྱ་རྩིས་ལེགས་བཅོས་ཀྱི་བཀའ་ཕབ་པ་ནུབ་ཀྱི་ཁྱད་ཆོས་ལྡན་པའི་རྒྱ་ནག་ཞིང་རྩིས་དར་མགོ་བརྩམས།
བོད་སོག་མཉམ་འབྲེལ་གྱི་སྲིད་དབང་སྐབས་ལྔ་བ་ཆེན་པོས་བོད་རྩིས་དེ་དུས་འཁོར་ལུགས་ཀྱི་རྩིས་དང་བསྟུན་ཏེ་ལེགས་བཅོས་བྱས། འོན་ཀྱང་བོད་ལོ་ནི་མ་མཐའ་ཡང་རབ་བྱུང་བརྩི་བའི་དབུ་ཚུགས་པ་ཡས་མས་ནས་ཡོད་པ་ཞིག་རེད།
དེའི་རྗེས་རྒྱལ་དབང་སྐུ་ཕྲེང་བཅུ་གསུམ་པའི་བཀའ་ལྟར་ལྷ་སའི་སྨན་རྩིས་ཁང་ནས་ལོ་ཐོ་བསྒྲིགས་ནས། བོད་རྩིས་དེ་མདོ་དབུས་ཁམས་གསུམ་ལ་གཅིག་འགྱུར་ཡོང་ཐབས་བྱས་པ་རེད།
འོན་ཀྱང་ལོ་རྒྱུས་ཀྱི་རྒྱུ་རྐྱེན་གང་ཞིག་གིས་ཨ་མདོའི་ཡུལ་དུ་དེ་བོད་རྩིས་ཀྱི་སྔར་བཞིན་སྲ་བརྟན་མེད་པའི་རྣམ་པ་ཆགས་པ་རེད།
དངོས་ནས་བཤད་ན་ང་ཚོས་བོད་ཀྱི་ལོ་སར་གཅིག་འགྱུར་དགོས་ཟེར་བ་དེ་གློ་བུར་དུ་དྲན་བཞག་པ་དེ་འདྲ་མིན་པར། རྒྱལ་དབང་སྐུ་ཕྲེང་བཅུ་གསུམ་པའི་ཐུགས་བཞེད་སྐྱོང་སྟངས་ཤིག་རེད།
ཨ་མདོ་བས་བོད་ལོ་སར་བཞག་ན་ཞིང་རྨོ་བའི་དུས་ཚིགས་སོགས་ལ་མི་འོས་པའི་གནད་མང་པོ་བཤད་ཡོང་བ་རེད།
ངས་བཤད་འདོད་པ་ནི་བོད་ལྗོངས་ཀྱི་གཞིས་ཀ་རྩེ་ལྟར་བོད་རྩིས་ལྟར་ཟླ་བཅུ་གཉིས་པའི་ཚེས་དང་པོར་སོ་ནམ་ལོ་སར་རོལ་བ་ལྟར། ཨ་མདོ་བས་ཀྱང་ཞིང་རྨོའི་དུས་ཚོད་དང་མཚམས་པའི་བོད་རང་ལ་ཡོད་པའི་སོ་ནམ་ལོ་སར་ལྟ་བུ་རོལ་བ་ལས། ཡིན་གཅིག་མིན་གཉིས་རྒྱ་ནག་ཞིང་རྩིས་ལྟར་ལོ་སར་རོལ་དགོས་པའི་དོན་མེད་དོ་སྙམ།
གལ་ཏེ་རོལ་དགོས་ཀྱང་འདི་ལ་ལོ་ཆུང་དང་ཡང་ན་སོ་ནམ་ལོ་སར་ལྟ་བུའི་མིང་འདོགས་པ་ལས་བོད་ཀྱི་ལོ་སར་ཞེས་འདོགས་མི་འོས་སོ་སྙམ་ལ། མདོར་ན་ལྷ་སའི་སྨན་རྩིས་ལྟར་གྱི་བོད་ལོ་དེ་འདོར་མི་འོས་སྙམ། མདོར་ན་ཕ་མེས་ཡབ་མེས་ཚོས་རིགས་གཞུང་དེ་འདོར་མི་འོས་སྙམ།
༢༡༤༨/༡༢/༡
No comments:
Post a Comment