བྲོས་བྱོལ། འོད་ལོ་ཁྲག་ཁྲིག་གཉིས་ཀྱི་ཁེར་རྐྱང་།

 དཔེ་འཕྲིན་སྙིང་བསྡུས། 

ཉེ་ཆར་བོད་ཀྱི་དཔེ་མཛོད་ཁང་ནས་བདག་གི་འགྱུར་དེབ་<<བྲོས་བྱོལ་>>དང་<<འོད་ལོ་ཁྲག་ཁྲིག་གཉིས་ཀྱི་ཁེར་རྐྱང་>>གཉིས་དཔར་བསྐྲུན་བྱས་པར་སྙིང་ཐག་པ་ནས་ཐུགས་རྗེ་ཆེ་ཞུ། སྤྱིར་ལོ་ངོ་ཁ་ཤས་སྔོན་ནས་འགྱུར་དེབ་འདི་གཉིས་བསྒྱུར་བསྒྲིགས་ཀི་ཐོག་མའི་དམིགས་འདུན་གཞིར་བྱས་ནས། བོད་ནང་གི་དཔེ་སྐྲུན་ཁང་ག་གེ་མོར་བསྐུར། ཡིན་ནའང་གེགས་རྐྱེན་མང་པོར་འཕྲད་ནས་སྤྱི་ཚོགས་ནང་འགྲེམ་སྤེལ་གྱི་ཆོག་མཆན་མ་ཐོབ།

 

སྤྱིར་ན་འགྱུར་དེབ་འདི་གཉིས་ནི་སྒྱུ་རྩལ་རྩོམ་རིག་གི་ཁོངས་སུ་གཏོགས་པ་ལས་སྲིད་དོན་དང་འབྲེལ་བ་སྤུ་ཙམ་མེད་མོད། དེང་སྐབས་ཡོད་ཚད་པོ་དོགས་གཞིའི་ངོ་བོར་བསྒྱུར་འགྲོ་བ་དེ་ཡང་ང་ཚོ་ཐུན་མོང་ལ་འཕྲད་པའི་དཀའ་ཁག་ཅིག་ཡིན་པར་མཐོང་།

 

ཕྱི་ལོ་༢༠༡༠ ཡས་མས་ཤིག་ནས་སྔོན་བྱོན་རྩོམ་པ་པོ་དང་ལོ་ཙཱ་བ་མང་པོ་ཞིག་གི་བརྩམས་ཆོས་བཀླགས་པའི་ཞར་ལ། མི་རིགས་གཞན་གྱི་རིག་གནས་ཤེས་བྱ་སྣ་ཚོགས་ནང་འདྲེན་བྱ་བར་འབད་པ་ཡིན། དེ་ནི་གཅིག་ནས་ཕྱི་ནང་གི་རྐྱེན་ངན་བར་ཆད་རབ་དང་རིམ་པའི་ཁྲོད་དུ་བོད་སྐད་ཡིག་སློབ་གསོའི་ཁོར་ཡུག་དང་ཁྲོམ་ར་དང་ལས་རིགས་དང་སྤྱོད་སྒོ་ཧ་ཅང་ཉག་ཕྲ་བའི་སྐབས་འདིར། ང་ཚོ་གོང་འོག་ཚང་མས་ནུས་སྟོབས་མཉམ་སྤུངས་དང་ཕྱར་བ་གྲུ་འདེགས་ཀྱི་སྒོ་ནས། རང་གི་ཕ་སྐད་མ་ཡིག་བཀོལ་སྤྱོད་ཀྱི་ནུས་པ་མཐོར་འདེགས་གཏོང་ཐབས་དང་། དཔེ་ཀློག་གི་གོམས་སྲོལ་རྒྱུན་འཁྱོངས་བྱ་ཐབས། རྩོམ་ཡིག་འབྲི་སྦྱོང་དང་ཡིག་སྒྱུར་གྱི་མོས་པ་བསྐྱེད་ཐབས། དེ་ག་ནང་བཞིན་རང་གཞན་གཉིས་ཀྱི་ཀུན་རྟོག་གི་བློ་སྒོ་འབྱེད་ཐབས་བཅས་ལ་ཕན་པའི་འབྲས་བུ་ཅུང་ཙམ་ཨེ་འཐོན་ལ་བརྩོན་པ་ཡིན། གཉིས་ནས་བོད་ནང་ལོགས་དང་མི་འདྲ་བར། ཕྱི་ལོགས་ནས་འཛམ་གླིང་ཤར་ནུབ་ཀྱི་རྩོམ་རིག་སྒྱུ་རྩལ་དང་ལོ་རྒྱུས་ཤེས་བྱ་སྣ་ཚོགས་ལ་ལྟ་ཀློག་དང་མྱོང་རོལ། འབྲེལ་འདྲེས་དང་འཚོལ་བསྡུ། ཡིག་བསྒྱུར་དང་འགྲེམ་སྤེལ་བྱ་བའི་ཁོར་ཡུག་དང་གོ་སྐབས་འཛོམས་པས་ཡིན།

 

འགྱུར་དེབ་འདི་གཉིས་ཀྱི་ནང་དུ་དུས་རབས་བཅོ་བརྒྱད་ནས་ཉེར་གཅིག་བར་གྱི་འཛམ་གླིང་ཤར་ནུབ་ཀྱི་གནའ་དེང་གི་རྩོམ་པ་པོ་དང་། ལྷག་པར་དུ་ནོ་བྷིལ་རྩོམ་རིག་གཟེངས་རྟགས་ཞལ་བཞེས་གནང་མཁན་སྐྱེས་པ་དང་བུད་མེད། རྒན་རབས་དང་གཞོན་རབས་སོགས་རྩོམ་མཁན་བརྒྱད་བཅུ་ལྷག་དང་། ཁོང་རྣམ་པའི་རྩོམ་ཡིག་སུམ་བརྒྱ་མ་ཟིན་ཙམ་བསྒྱུར་བཏུས་བྱས་ཡོད།

 

རྩོམ་མཁན་མང་ཤོས་མི་རིགས་སོ་སོའི་རིག་གནས་སྒྱུ་རྩལ་གྱི་གཤིན་ས་ལྟུ་བུ་དང་། དུས་རབས་རིམ་བྱུང་གི་རྩོམ་རིག་ལོ་རྒྱུས་ཀྱི་རྡོ་རིང་ལྟ་བུ་ཡིན་འདུག བརྗོད་བྱ་བརྗོད་བྱེད་ཀྱི་ཐད་ནས་དགའ་སྐྱོ་ཆགས་སྡང་གི་འདུ་ཤེས་ཁམས་དང་གཤིས་སུ་བདོག་པའི་དངོས་ཡོད་འཚོ་བ་དང་སྤྱི་ཚོགས་ཁྲོད་ཀྱི་མཛའ་བརྩེ་དང་འདུ་འབྲལ། དུས་ཟིང་དང་ཆག་འཇིག དབུལ་ཕོངས་དང་དཀའ་སྡུག ཕུགས་བསམ་དང་འཚོལ་སྙེག་སོགས་མི་ཆོས་རིང་ལུགས་ཀྱི་ལྟ་དགོངས་གཙོ་ཆེ་ཞིང་། རྩོམ་ལས་ཀྱི་ཐད་ནས་རང་མོས་དང་ལྷུག་མ། བྱིས་སྒྲུང་། འབོལ་རྩོམ་དང་སྒྲུང་རྩོམ་བཅས་སུ་གཏོགས།

 

དེ་ལྟ་ནའང་། ང་རང་གི་ཡིག་བསྒྱུར་གྱི་ཆུ་ཚད་དམའ་བ་དང་ཡོན་ཚད་དམན་པ། ལྷག་པར་དུ་ཁ་མིག་ཡར་ལྟ་བྱེད་སའི་དེང་གི་བོད་ཕྱི་ནང་གཉིས་ཀྱི་ཡིག་སྒྱུར་གྱི་གནས་བབ་ཤིན་ཏུ་ནས་ཞན་པ་ལྟར། ང་རང་གིས་ཐད་བསྒྱུར་དང་དོན་བསྒྱུར་ཟུང་དུ་སྦྲེལ་བའི་འགྱུར་རྩོམ་འདི་དག་གི་ཁྲོད་དུའང་ད་དུང་འགྱུར་སྐྱོན་དང་ཆད་ནོར། ལྷག་པར་དུ་སྒྱུ་རྩལ་ནི་སྙན་ངག་གི་ཆེས་བླ་ན་མཐོ་བའི་ཁམས་ཡིན་ཞེས་པར་ལྟར། ང་རང་གི་ངོས་ནས་སྙན་རྩོམ་འདི་དག་བོད་སྒྱུར་བྱེད་སྐབས། དོན་ཉམས་གཅིག་པུ་མ་ཡིན་པར། ཕྱི་གླིང་བའི་ཚིགས་ཉམས་ཏེ་སྐད་ཆའི་སྒྱུ་རྩལ་ལམ། ཡང་ན་དེའི་ཉམས་འགྱུར་དང་དབྱངས་རྟ་གཙོ་བོར་བཟུང་ཡོད་པས། རང་ཅག་གི་སྐད་ཆའི་ལུགས་དང་མི་མཐུན་པའི་ཆ་མི་ཉུང་བ་རེ་ཡོད་སྲིད་པས། གཟུར་གནས་ཀྱི་དཔྱོད་ལྡན་པ་དག་གིས་ཀུན་སློང་གཙང་མ་ཞིག་གི་སྒོ་ནས། འགྱུར་དེབ་འདིའི་ལྷད་སྐྱོན་དག་བཅོས་དང་ལྟ་དགོངས་ལྷུག་བརྗོད་གནང་ན་ནི། རང་གཞན་ཀུན་གྱི་བློ་སྒོ་འབྱེད་པར་ཕན་ནུས་ཆེན་པོ་འདྲོང་ངེས་པས། དེ་དོན་ལ་ཐུགས་གཞིགས་གནང་བའི་རེ་བ་ཡོད།