རྩོམ་པ་པོ་གཉན།
ཁྱེད་རང་ལྕེབ་ཤི་མི་དགོས་པའི་རྒྱུ་མཚན།
གངས་རི་ཆེན་པོ་དེ་དངངས་འཚབ་སྐྱེས་སྐྱེས་ནས།
བུ་ཕྲུག་དག་ཁྲིད་དེ་འགྲོ་རྩིས་བྱེད།
དུས་ཚོད་ཀྱི་སྔ་རོལ་དུ་འགྲོ་རྩིས་བྱེད།
དམར་ཟས་ཀྱི་ཚབ་བྱེད་ཆོག་པའི་རིག་གནས་ཡོད་པའི།
གནའ་བོའི་དཔུང་རྗེན་གྱི་ཚོ་བ་དག
ཉིན་རེར་བྱེ་ཐང་དུ་འགྱུར་གྱིན་པའི་འཇིག་ཉེན་ལ་གདོང་གཏད་དུས།
རང་དབང་མེད་པར་གཙང་བོའི་ནང་དུ་ལྕེབས་རྩིས་བྱེད།
ཀྱེ། ཚ་གདུག་དང་བྱེ་ཚན་གྱི་བཙན་འཛུལ་ལ་འཇིགས་ཤིང་དངངས་ནས།
མགོ་བོ་སྨད་པར་རྩོམ་པའི་ང་ཡི་སྤུན་ཟླ།
ཡུད་ཙམ་ལ་སྒུག་རོགས་བྱོས་ཡ། སྒུག་རོགས་བྱོས།
སྐམ་ས་ཆེན་པོ་འདི་ལ་ནུབ་རླུང་ལྡང་ཡོང་བའམ།
ཡང་ན་ཆར་ཆུ་བར་མེད་དུ་ཕྱོ་བའི་བར་དུ་སྒུག་རོགས་བྱོས།
ནམ་མཁའ་ནས་ལྷུང་མ་མྱོང་བའི་བྱ་རྒོད།
ནམ་མཁའ་དང་འགྲོགས་ནས་ངོ་མཚར་བྲིས་ཆོག་ན།
ཁྱེད་ཀྱི་སྐྱེ་རབས་དང་རྟོགས་བརྗོད་ཀྱི་སྡེར་ཤུལ་ཡང་།
ནམ་མཁའ་དང་མཉམ་དུ་ཡོད་པ་མ་ཡིན་ནམ།
མུན་ནག་གི་མཚན་མོའི་སྙིང་དབུས་སུ།
གཏོར་བཤིག་གི་ཀུ་ཅོ་འདོན་པའི་བྱིས་པ་དེ་སུ་ཡིན་ནམ།
མུན་ནག་གི་མཚན་མོ་འདི་ལ།
ཕྱོགས་སོ་སོ་ནས་ཀུ་ཅོ་མཚམས་མི་ཆད་པར་འདོན་ངེས་ལ།
དེའི་འཕྲོ་ནས་ང་ཚོ་ཚང་མ་སད་འོང་ངེས་རེད།
ལོ་རྒྱུས་སྙིང་བསྡུས།
སྙན་ངག་པ་འཇང་རྩེ་དོན་ཁོ་འམ་གཉན་དུ་འབོད་པ་ཁོང་ནི་ཕྱི་ལོ་༡༩༧༨ ལོར་མདོ་སྨད་ཁྱུང་མཆུ་རྫོང་དུ་སྐྱེས་ཤིང་། སི་ཁྲོན་རྔ་བ་ཁྱུང་མཆུ་རྫོང་ས་གནས་ལོ་རྒྱུས་ཞིབ་འཇུག་ཁང་གི་ལས་བྱེད་པ།
ཡུམ་སྐད་རྩོམ་པ་པོ་དང་སི་ཁྲོན་རྩོམ་པ་པོ་མཐུན་ཚོགས་ཀྱི་ཚོགས་མི་ཡིན་ལ།
བོད་ནང་དུ་རྩོམ་རིག་བྱ་དགའ་མང་པོ་ཐོབ་མྱོང། བརྩམས་ཆོས་གཙོ་བོར་<<རོ་ལངས་>>དང་<<ལག་རྩལ་>>སོགས་ཡོད།
No comments:
Post a Comment