རྩོམ་མཁན་ཐེ་ཀོར། ལོ་ཙཱ་བ་ན་བུན། 』
ངའི་རྒྱང་བཞུད་ཀྱི་དུས་ཚོད་དང་ལམ་ཐག་ཤིན་ཏུ་རིང་།
ནངས་སྔ་མོའི་སྐྱ་རེངས་ངོགས་སུ། ང་རང་ཤིང་རྟར་བསྡད་ནས་ལམ་ལ་ཆས། རྒྱུ་སྐར་གྲངས་མེད་ལ་ཞབས་རྗེས་འཇོག་བཞིན། ངས་མུ་མེད་ལུང་སྟོང་གི་འཇིག་རྟེན་འགྲིམས།
ཆེས་རིང་བའི་ལམ་ཐག་ནི་ཁྱེད་དང་ཁད་ཐག་ཆེས་ཉེ་བར་བཅར་བ་དེ་ཡིན་ཞིང་། ཕལ་བའི་དབྱངས་རྟ་ཞིག་གི་མཇུག་སྐྱོང་བར། ཆེས་དཀའ་སྡུག་གི་སྦྱོང་བརྡར་བརྒྱུད་དགོས།
རང་ཉིད་ཀྱི་སྒོ་མོ་འཚོལ་ཆེད་དུ། རྒྱང་བཞུད་པས་རྒྱུས་མེད་ཀྱི་སྒོ་གླེགས་རེ་རེ་བཞིན་བརྡུང་དགོས།
ཕྱི་ཡུལ་རྒྱལ་ཁམས་འགྲིམ་པའི་མི་དེ། གཟོད་ནང་སེམས་ཀྱི་དག་ཞིང་ལ་སླེབ་ཐུབ།
ངའི་འདྲེན་བྱེད་ཟུང་གིས་སྟོང་ཆེན་མོའི་འཇིག་རྟེན་ལ་རྒྱང་ལྟ་ཞིག་བྱས་རྗེས།
མིག་ཟུང་བཙུམས་ཏེ“ཁྱེད་རང་འདི་ན་འདུག”ཅེས་སྨྲས།
“ཀྱེ། ཁྱེད་གང་དུ་ཡོད”ཅེས་པའི་རེ་དོགས་དང་གདུང་འབོད་ཆབས་ཅིག ཆུ་ཕྲན་སྟོང་གི་མིག་ཆུར་འདྲེས་ཤིང་། “ང་འདི་རུ་ཡོད”ཅེས་པའི་དྲི་ལན་གྱིས་འཇིག་རྟེན་ཡོངས་རླབས་ཀྱིས་གཤེར།
རྒྱབ་ལྗོངས་སྙིང་བསྡུས།
སྙན་རྩོམ་འདིའི་ནང་དུ་བདག་ཉིད་ཆེན་མོ་ཐེ་ཀོར་གྱིས། ཐོག་མར་རྒྱལ་ཁམས་སམ་མི་མེད་ལུང་སྟོང་གི་འཇིག་རྟེན་ཞབས་ཀྱིས་འཇལ་བའི་གོ་རིམ་འཁོད་ཅིང་། དེའི་རྗེས་དཀའ་སྡུག་རབ་དང་རིམ་པར་བརྒྱུད་མཐར། འཇིགས་རུང་གི་གཡུལ་འཐབ་འདྲ་བའི་མི་ཚེ་རྒྱང་བཞུད་ལས་རྣམ་པར་རྒྱལ་བའི་ཚུལ་བརྗོད་ཡོད། དེ་ཡང་ཁོང་གིས་རྒྱལ་ཁམས་འགྲིམས་པའི་དཀའ་སྡུག་གི་གཡུལ་སར་རང་རྟོགས་སད་ཀྱང་། མྱོང་བ་དེ་ནི་ཐོག་མར་རང་ཡིད་དུ་ཤར་བ་ནང་བཞིན་ལས་སླ་བ་ཞིག་གདོད་ནས་མ་ཡིན་པར། དཀའ་སྡུག་གི་གཡུལ་འཐབ་གྲངས་མེད་ཐོད་ཀྱིས་བསུས་ན། ད་གཟོད་མི་ཚེ་འཚོལ་སྙེག་དང་ཕུགས་བསམ་གི་ཞིང་ཁམས་སུ་སླེབས་པར་བཞེད།
No comments:
Post a Comment