ཁ་རོ་ན།
『རྩོམ་མཁན་ཕུལ་སི་ལན། སྒྱུར་མཁན་ན་བུན།』
སྟོན་ཀས་ཤིང་ལོར་སེན་འཐོག་བྱས། ངའི་ལག་པ་བརྒྱུད་ནས།ངེད་གཉིས་མཛའ་གྲོགས་ཡིན།
དུས་ཚོད་ཀྱི་ཤུན་པགས་བཀོག་སྟེ། ངེད་གཉིས་ནང་སྙིང་བྲུས་ནས་གོམ་ཙེ་བསླབས།
དུས་ཚོད་ནི། ཤུན་པགས་ནང་ལ་ཕྱིར་འཛུལ་སོང་།
མེ་ལོང་ངོས་སུ་གཟའ་ཉི་མ་གཅིག་པུ་ཚེས་འདུག
རྨི་ལམ་ནང་དུ་གཉིད་ཁུག་ཅིང་། བདེན་པ་ཁ་ནས་གློད་འོང་གིན་འདུག
ང་ཡི་མིག་འབུར། མཛའ་མོའི་རྒྱུ་ཞབས་ཏུ་ལྷུང་སོང་།
ངེད་གཉིས་ཕན་ཚུལ་ཧྲིག་གེར། མུན་ནག་གི་གཏམ་རྒྱུད་གླེང་།
ཕྱི་དྲན་དང་འདྲ་བར། ཉལ་ཐ་མེ་ཏོག་དང་ཡང་འདྲ་བར།
ངེད་གཉིས་གཞན་པ་ཞིག་ལ་དུངས་བྱུང་།
ངེད་གཉིས་གཉིད་དུ་ཡན། མཚོ་འགྲམ་གྱི་ཉ་ཕྱིས་ནང་འཁྱིལ་བའི་རྒུན་ཆང་ནང་བཞིན།
ཟླ་བའི་ཁྲག་རྩར་འཕྱུར་བའི་མཚོ་ཆུ་ནང་བཞིན།
ནང་སྙིང་ཞིག་དྲག་ཏུ་མཆོང་འོང་གིན་འདུག ངལ་དུབ་མེད་པར།
སྒེའུ་ཁུང་ནང་ནས། ངེད་གཉིས་ཕན་ཚུན་འཁྱུད་ཅིང་།
སྲང་ལམ་མཐིལ་ནས། མི་མང་གིས་ང་ཚོར་ཅེར།
འདི་ནི། རྡོ་བ་མེ་ཏོག་ལ་སྨོན་པའི་དུས་ཚིགས་རེད།
འདི་ནི། མི་རྣམས་ཉིད་ལས་སད་པའི་དུས་ཚིགས་རེད།
དུས་ལ་འཁེལ་འདུག དུས་ཚིགས་སླེབས་སོང་།
ད་ནི། དུས་ལ་འཁེལ་བྱུང་།
རྩོམ་མཁན་གྱི་ལོ་རྒྱུས་སྙིང་བསྡུས།
〖ཕུལ་སི་ལན་(Paul Celan 1920–1970)ནི་དེང་གི་ཡུ་རོབ་ཤར་རྒྱུད་རྒྱལ་ཁབ་ཡུ་ཁུ་རེན་(Ukraine)དུ་སྐྱེས་ཤིང་། ཡུལ་དེའི་མི་རིགས་འཇར་མན་ཇེའུ་(German Jewish)མི་རིགས་ཀྱི་སྙན་ངག་པ་དང་ལོ་ཙཱ་བ་ཡིན།
ཁོང་གི་གསར་རྩོམ་སྙན་ངག་ལ་དུས་རབས་ཉི་ཤུ་བའི་ཧྥ་རན་སིའི་བག་མེད་མངོན་འགྱུར་རིང་ལུགས་(Surrealism)ཀྱི་ཤན་ཤུགས་ཟབ་མོ་ཐེབས་ཤིང་། འཛམ་གླིང་འཁྲུག་ཆེན་གཉིས་པའི་རྗེས་ཀྱི་ནུབ་གླིང་གི་རྩོམ་རིག་གསར་རྩོམ་ཐད་ནས་ཕྱི་རབས་པའི་བསམ་བློར་ཤུགས་རྐྱེན་ཆེ་བའི་མི་སྣའི་གྲས་སུ་ངོས་འཛིན།
འཐུས་ཚབ་སྙན་ངག་ལ་<<འཆི་བའི་འོ་དོད་>>(Death Fugue) དང་། སྙན་དེབ་ལ་<<སྙན་ངག་གཅེས་བསྡུས་>>(Selected Poems) སོགས་བཞུགས།〗
No comments:
Post a Comment